Кулöмдiнса да Кебанъёльса велöдчысьяслöн бать-мам школаö ветлан паськöм вурöдöны Кебанъёльса асшöр уджалысь Елена Николаевна Ключко дорын. Вурöмторъяссö медся вылö донъялiсны вурсьысьяслöн «Вося платтьö» республикаса петкöдчöмын, кытчö таво медводдзаысь пыртiсны школаö ветлан паськöм. Парскис нималысь Воркутаса фабрикаöс да «Биарма» котырöс.
-Госстандартлы лöсялан дöраяс ваяла Екатеринбургысь дв Брянскысь. Модасö бöрйöны бать-мам да быдтасъясныс. Шыöдчысьяс дöрö ветла школаöдз. Видлыны да мерайтны волöны и ме дорö. Вурся кöртымалöм нёль жыръя патераын. Райадминистрация сетiс кöртымö вурсян кык машина, рöмпöштан, кык манекен, пызан-улöс. Вура быдтор, — висьталiс Е.Н.Ключко.

Вурсьö челядьдырсянь. Медводз вурсис аканьяслы, а сэсся аслыс, вокъяслы, бать-мамлы. 11 классын велöдчигöн мамыс ньöбис сылы вурсян бур машина. Елена Николаевна помалiс Сыктывкарса вöр институт, лоис экономистöн. Уджавлiс Кебанъёльса училищеын. 2010 воын верöсыскöд восьтiс öтувъя асшöр удж. Сiйö вурсьысь, а верöсыс сваритчысь. Елена Николаевналы отсасьö 8 классын велöдчысь Виктория нылыс, кодi таво ас вурöм платтьööн лоис районса олимпиадаын медся бурöн.
Пасъям, мый «Вося платтьö» петкöдчöм вылö ветлiс и Югыдъягса асшöр уджалысь М.В.Шолдя.
Марина ДАДАШОВА.