Кулöмдiнысь Александр Михайлович Попов Вяткаса государственнöй гуманитарнöй университетын велöдчö бöръя во, лоас юристöн. Сiйöс жö, сöмын водзтi вöлi Кировса педагогическöй государственнöй институтöн, помавлiсны бать-мамыс. Александр велöдчö интернет пыр, мöд ногöн кö, дистанционнöя. Тавося июньсянь уджалö туй дзоньталан да вöчан Кулöмдiнса участокын делö нуöдысьöн.

— Уджалысьяслöн котыр зэв бур да шань, меным отсалöны быдторйöн, туйдöны, велöдöны. Удж сьöлöм серти, — висьталiс Александр.
Зон юрсиктса водзмöстчысь том йöзкöд. Петкöдчылiс «Мый? Кöнi? Кор?» ворсöмын, ворсiс «Азимутын», ёнмöдö дзоньвидзалунсö «Олимпикын». Сылöн уна ёрт, некор оз усь ловнас. Бать-мамыс пыр эскöдöны бурö. Писö радейтöны сэтшöмöн, кутшöмöн чужис. Пыр водзсасисны висьöмкöд. Александр ичöтсянь вöлi зэв вежöраöн. Матыссаяс гöгöрвоöдiсны, мый ставыс ас саяс, сöмын колö ыджыд кöсйöм да зiльöм. Киясыс уджалiсны бура, а кокъяс эз кывзысьны, найöс колiс бурдöдны, и Александр квайт арöссянь сизимöд классöдз бурдöдчис да велöдчис И.П. Морозов нима реабилитация шöринын. Сэтысь бур сьöлöма бурдöдысьяс да уджалысьяс республика пасьтаысь воöм вермытöм челядьлы да томуловлы вöлiны мöд бать-мамöн. Вöчис ставсö, мый тшöктiсны бурдöдысьяс. Ветлiс коляскаöн, а сизим арöсöн сувтiс кок вылö. Ышöдiс мукöд челядьöс, эскöдiс бурö. Бать-мамыс волывлiсны быд вежон, сёрнитiсны-юасисны эз сöмын пиыслысь, но и öти жырйын олысьяслысь, öтлаын велöдчысьяслысь.
Велöдчис бура, медся ёна радейтiс литература да история. Ёна лыддьысис. Сьöлöм вылас волiс классика. Зэв бура тöдiс Сергей Есенинлысь, Александр Пушкинлысь, Михаил Лермонтовлысь, Николай Гогольлысь кывбуръяс, висьтъяс, мойдъяс. Велöдчигöн пыр петкöдчылiс олимпиадаясын да конкурсъясын. И вермывлiс.
Сизимöд классын локтiс чужанiнö. Кöсйис, кыдзи и ставöн, ветлыны школаö, пукавны урокъяс вылын, велöдны ставсö, но бурдöдысьяс вöзйисны öти во велöдчыны гортын. Та вöсна локтiс школаö кöкъямысöд классын. Велöдчысьяс лоисны ёртъясöн. Александр вермис сёрнитны быдтор йылысь, висьтавны ассьыс мöвпсö, видзöдлассö, коркö да и вензьыны. 8-9 классъясын пукалiс медся колана урокъяс вылын, а 10-öд классянь став вылас нин. Школаö коркö батьыс вайлiс машинаöн, коркö да ачыс воöдчылiс батьöн лöсьöдöм куим гöгыля велосипедöн, а коркö да и подöн. Велöдчысьяс эз шензьыны, эз серавны. Ёртъяс виччысьлiсны нин, чолöмасьлiсны да öтлаын пырлiсны классö. Александр эз радейт, мед сiйöс жалитiсны. Ставсö вöчис ачыс. Бура помалiс школа.
— Ме важысянь нин мöвпалi лоны юристöн. Кировö ветлi батькöд. Бура сдайтi экзаменъяс да пыри велöдчыны. Дерт, верми велöдчыны да овны Кировын, öд шöринын велöдiсны быдторйö, но бöрйи интернет пыр велöдчöм. Бура тöда компьютер. Буретш сы пыр ёртася унакöд. Сы пыр жö лыддя радейтана гижысьяслысь книгаяс, юкся ёртъяскöд ас видзöдласöн да мöвпъясöн. Зэв нимкодь, мый бöръя воясö район ёна сöвмис, ыджыд тöдчанлун сетö вермытöмъяслы. Уналаын вöчисны коляскаöн ветлысьяслы пыранiнъяс. Миянöс пыдди пуктöны, гöгöрвоöны да отсалöны. Миянöс кылöны да кывзöны. Миянöс кылöны да аддзöны, кыдзи и дзоньвидза йöзöс. Ме ола шуда позйын. Ме зэв ыджыд аттьö висьтала бать-мамлы, кодъяс пуктiсны уна вын, мед ме сöвми быд боксянь. Менам эмöсь ичöтджык кык вок. Ставöн öта-мöдöс радейтам, гöгöрвоам, пыдди пуктам, отсасям, — мича нюмöн кывкöртiс Александр.
Марина ДАДАШОВА.
Гижысьлöн снимок вылын: Александр Попов.