20.03.2019

Александр Иванович Попов культура юкöнын 2011-öд вося ноябрсянь. Сiйö лёк суöмысь видзчысьöм кузя медшöр инженер. Сылöн видзöдлас улын, районса культура керкаысь кындзи, 34 культура керка да клуб, сэнi бергöдчысьяслöн тыр-бура уджалöм. Велöдö удж вылö сöмын на пырысьясöс. Урчитöм кадö волö быд котырö, индö, кодi мыйысь кывкутö неминучаяс дырйи, донъялö, сяммöны-ö уджалысьяс вöчны урчитöмтор, кужасны-ö шöйöвоштöг петкöдны йöзöс öзйылöмъяс дырйи. Медся пöсь кад — выль вося гажъяс кежлö дасьтысьöм, кор коз дорö чукöрмылö уна челядь. Видзöдö, мед вöлiны кусöдчанторъяс, вöлi восьса петан став öдзöс. Тадзи жö гöгöрбок видзöдалö мукöд гажъяс кежлö дасьтысигöн. Александр Иванович видзöдö, мед тöвнас колана ногöн весалiсны культура керкаяс да клубъяс дорысь пыранiнъяс, тулысын вевтъяс вылысь лым усигöн керкаяс гöгöр вöлiны öлöдан пасъяс.

Февраль 19-20-öд лунъясö Москваын чукöртчылiсны странаысь крестьянин овмöс кутысьяс да кооперативö öтувтчöмъяс. Республикаысь ветлiм нёльöн: кыкöн министерствоысь, крестьянин овмöсъяслöн республикаса ассоциацияöн юрнуöдысь Пётр Михайлович Попов да ме. Сёрнитiсны сы йылысь, кыдзи сöвмисны ас нянь вылö 30 во сайын петысьяс, мый шедöдiсны да кутшöм налöн аскиа лун. Медводдза лунас медтöдчанаторъяс видлалiм Россияын крестьянин овмöсъяслöн да видз-му овмöс кооперативъяслöн ассоциацияöн юрнуöдысь, Госдумаса депутат Владимир Плотниковкöд, Россияысь видз-му овмöсса министрöс медводдза вежысь Джамбулат Хатуовкöд, министрöс вежысьяс Елена Фастовакöд да Оксана Луткöд.