Медбурöсь «Багатыръяс»

[ A+ ] /[ A- ]

Март 2-öд лунö Пожöгын кöкъямысöдысь мунiс «Йиркап» ордйысьöм. Ордйысьысьяслы да видзöдысьяслы мойвиис: луныс вöлi мича, и чеплясь-ысь кöдзыд шондi улын личалiс. Таво вермасьны волiс 11 котыр, быдöнын нёль мортöн: «Комета» (Кебанъёль), «Богатыри» (Пожöг), «Оптимисты» (Парч), «Убойная сила» (Керчомъя), «Томлун» (Куж), «Томулов» (Помöсдiн), «Кулöм-дiнса ёртъяс» (Кулöмдiн), «Туристы» (Руч), «Викинги» (Мылдiн), «Молодёжный центр» (Сыктывкар), «Горячие сердца» (Княжпогост).
Чукöртчысьясöс чолöмалiсны районса админист-рацияöн веськöдлысьöс вежысь Н.А.Левченко, овмöдчöминса юралысь З.Е.Попова, шоныд кывъяс висьталiсны да сиисны вермыны Йиркап да Зарань. Тöдмасигмоз котыръяс висьталiсны ассьыныс нимъяс да ышöдан кывъяс. Ордйысьны петтöдз чукöртчысьясöс чöсмöдлiсны няньöн-солöн, капустаа пирöгъясöн. Медым «кыйсигöн» мовиис, мед эз торк «омöль», мед эз некод вом-дзав, колiс вуджны вожöдöм кыдз пу пыр. Кодъяскö сяммисны вуджны лöсьыда, а кодъяскö и эз тöрны да пуыс тратшмунлiс-потлiс.
Ордйысисны кыклаын. Лыжи сеталанiнын том йöз петкöдлiсны вын, винёвлун, тэрыблун, пельк-лун. Медводз колiс котöртны лямпаясöн 200 кымын метра. Вöрзьöдлытöм лым вылö петiсны капитанъяс, вына йöраяс моз талялiсны водзö мунысьяслы туй. На бöрся котöртiсны котырö пырысьяс. Кодкö шлывгiс-лэбис, а кодкö и сангысьлiс да кашкиг-пошкигöн воштiс кад. Некод эз сетчы, ставöн воисны помöдз, мед кö кольччöмöн. Та бöрын кыйисны урöс (лыйсисны пасö пневматика винтовкаысь), вермасисны ошкöд (сувтса кер пом вомöн вуджöдiсны куйлысь кер), кыскисны йöраöс (кыскисны лым кузя сьöкыдтор), вуджисны ю вомöн (котöртiсны йизьöм кер кузя), петкöдлiсны тэрыблун (лым вылын ворсiсны футболысь). Дерт, пöсявлiсны, а «ошкöд» вермасьöм да «йöраöс» кыскöм бöрын жуявлiсны да весиг водлiсны шойччыштны лым вылö. Абу и шензьöдантор: вöралысьлы кыйдöс некор эз шедлы кокниа.
Ордйысьысьяслысь да видзöдысьяслысь кыпöдiс лов, содтiс нимкодьлун районса культура керкаысь воöм автоклуб, кысянь юргисны коми сьыланкывъяс. Койгорт районысь асшöр уджалысь вузасис воййыв турунысь вöчöм чайöн. Быдöн вермис шонтысьны пöсь самöварысь чайöн, сёйны тшынöдöм яй да пöжас, кодöн вузасис Пожöгдiнысь А.И.Уляшев, челядь окотапырысь чöсмасисны «юмов ватаöн».
Шойччыштöм да нуръясьыштöм бöрын ордйысисны Пожöгса культура керкаын, петкöдлiсны важся да öнiя оласног. Быд котыр зiлис петкöдчыны аслыспöлöса. Княжпогост районысь да Сыктывкарысь воысьяс петкöдлiсны ворсöдны видзöдысьясöс, а юркарсаяс ылöсас бöрйöм куим мортлы козьналiсны асласныс шöринлöн паса шарфъяс. Ручса котыр тöдмöдiс районлöн мичлунъясöн.
Кыкпöлöс ордйысьöм донъялöм бöрын вермысьöн шуисны Пожöгса «Багатыръясöс», мöдöн лоис Ручысь «Туристалысьяс» котыр, коймöдöн — «Кулöмдiнса ёртъяс». Вермысьяслы козинъяс сеталiс «Коми войтыр» öтмунöмлöн районса представительствоö пырысь Люция Николаевна Вологжанина.
Княжпогостысь, Мылдiнысь да Сыктывкарысь воысьяс вуджисны кузь туй, но эз лоны вермысь-яс лыдын. Та вылö видзöдтöг, ловнаныс эз усьны. Аттьöалiсны ордйысьöм бура котыртöмысь, пöся вочаалöмысь да кöсйысисны волыны нöшта.
«Йиркап» гаж котыртiсны да нуöдiсны «Пожöг» овмöдчöминса администрация, том йöзлöн «Томъяс рулитöны» котыр, Кулöмдiн районса спорт шöрин, районса культура керка, велöдан управлениеысь том йöзкöд уджалан юкöн, Пожöгса школаын, школаса вердчанiнын да лыжи сеталанiнын, содтöд тöдöмлунъяс сетан шöринын уджалысьяс.
Лидия Липина, Вероника Савельева.

Комментарии:

Добавить комментарий

Свежий выпуск: 28 марта

Осторожно — мошенники!