Аскиа лун йылысь сёрни

[ A+ ] /[ A- ]

Февраль 19-20-öд лунъясö Москваын чукöртчылiсны странаысь крестьянин овмöс кутысьяс да кооперативö öтувтчöмъяс. Республикаысь ветлiм нёльöн: кыкöн министерствоысь, крестьянин овмöсъяслöн республикаса ассоциацияöн юрнуöдысь Пётр Михайлович Попов да ме. Сёрнитiсны сы йылысь, кыдзи сöвмисны ас нянь вылö 30 во сайын петысьяс, мый шедöдiсны да кутшöм налöн аскиа лун. Медводдза лунас медтöдчанаторъяс видлалiм Россияын крестьянин овмöсъяслöн да видз-му овмöс кооперативъяслöн ассоциацияöн юрнуöдысь, Госдумаса депутат Владимир Плотниковкöд, Россияысь видз-му овмöсса министрöс медводдза вежысь Джамбулат Хатуовкöд, министрöс вежысьяс Елена Фастовакöд да Оксана Луткöд. 
Мöд лунас миян водзын сёрнитiс Россияысь видз-му овмöсса министр Дмитрий Патрушев. Висьталiс, кутшöм пай пуктöны видз-му овмöс сöвмöдöмö крестьянин овмöс кутысьяс, кутшöм отсöг налы да сиктъяслы сетö государство. Чолöмалiс Россияса президент Владимир Путин да Россияса правительствоöн юрнуöдысь Дмитрий Медведев нимъяссянь. Тöдчöдiс, мый бöръя воясын видз-му овмöсын ичöт бизнес лоис сиктса олöмлöн подулöн, мыджсянторйöн. Видлалiм, кутшöм сьöкыдлунъяс эмöсь. Ичöт овмöсъяс пиысь уналы оз вичмы государствосянь отсöг, сьöкыд уджйöзавны банклысь, содöмöн содöны коммунальнöя могмöдöмысь да вöлöга вылö донъяс, найöс инавны сьöкыд, личкöны быдсяма службаяс, уна тырмытöмтор муöн вöдитчöм кузя. 
Февраль 28-öд да март 1-öд лунъясö республикаысь крестьянин овмöс кутысьяс чукöртчылiсны Сыктывдiн районö. Ветлiм Айдар Витальевич Фёдоровлöн крестьянин овмöсö, кодi восьтiс 49 куканьлы скöт карта, Сыктывкарын «КомиРыба» котырö, Паджгаын крестьянин овмöс кутысь Екатерина Александровна Лебедева дорö, видзöдлiм да тöдмасим республикаса видз-му овмöс техникумлöн велöдчан жыръясöн. 
Чукöртчылiгöн сёрнитiсны видз-му овмöс кузя министр А.П.Князев да сiйöс вежысь О.В.Бабина. Сёрнитi и ме. Тöдчöдi, мый талун государство сетö видз-му овмöс кооперативъяслы ыджыд тöдчанлун. Странаса олысьяс дорö шыöдчигöн та йылысь пасйис президент В.В.Путин. Странаын видз-му овмöс кооперативъяслы отсöг вичмö 2015-öд восянь. Содтiсны грантъяс вылö сьöм, но вичмыны сiйö кутiс этшалы. Законодательствоын эмöсь тырмытöмторъяс, кооперативъяслы оз тырмы сьöм, мед ньöбны оборудование, пöдтöны гырысь котыръяс да сьöкыд инавны вöлöга.
Иван Касев, 
«Комиагрорегион» кооперативлöн правлениеса директор. 
Гижысьлöн чукöртöмысь снимок вылын (шуйгавывсянь): П.М.Попов, И.В.Касев. 

Комментарии:

Добавить комментарий

Свежий выпуск: 28 марта

Осторожно — мошенники!