25.03.2019

«Коми энергосбытöвöй компания» котырлысь Кулöмдiн юкöнса керка позьö öткодявны мавзолейкöд. Быд лун танi зэв уна йöз. Мед веськавны, колö виччысьны кык-куим час. Автобусъяс бöр мунöны водз да быдöн пыравны оз веськав, лоö волыны некымынысь. Тадзи артмис сы вöсна, мый öти квитанцияын öтувтiсны биысь, ваысь, шоныдысь да шыблас петкöдöмысь донъяс. Тавосянь счётчикъясысь лыдпасъяс быд тöлысь юöртам «Энергосбытö» да сiйö и ыстö квитанцияяс. Уналöн синъясныс чашкавлiсны, кор тайö квитанцияяссьыс аддзисны ыджыдсьыс-ыджыд донъяс. Та мындаыс абу на сувтлöма некор. Январын ва арталан счётчикъяслысь лыдпасъяс юöртлiм «Шоныд сетан Коми компаниялöн» Кулöмдiнса юкöнö, кодлы колiс найöс сетны «Комиэнергосбытö», но сэтчö абу воöма. Ыстысисны öта-мöд выланыс. Арталiсны эз счётчикъяслöн лыдпасъяс, а олысьяслöн лыд да нормативъяс серти. Абу гöгöрвоана, кыдзи юкöмаöсь йöзöн вештысьöмсö. Кодлыськö став донсö босьтöмаöсь шоныдысь, кодлöнкö мунöма биысь. Кодкö да мыйыськö кольöма уджйöзöн. Либö компьютеръясыс «дурöны», либö уджалöны кийывсöн. 

Март 20-23-öд лунъясö Воркутаын мунiс волейбол кузя республикалöн тшупöдын ставроссияса вермасьöм. 
Петкöдчисны 2004-2005 воын чужöм ныв-зон: Кулöмдiнысь нывъяс (тренер Т.И.Сидоренко) да Помöсдiнысь зонъяс (тренер В.И.Уляшев). Вайисны зарни медальяс. Апрельын мунасны Петрозаводскö.

Март 26-öд лунö шылад велöдан Кулöмдiнса школаö вайисны выль пианино. 
Могмöдiсны «Культура» уджтас серти. Татшöм пианиносö сетiсны республикаса быд школалы. Инструментыс зэв бур. Сы вылын кутас велöдны том специалист Светлана Николаевна Липина.