Йöввывдырся вежонлöн бöръя лунö гажа вöлi районса культура керка дорын. Буретш март 10-öд лунö юрсиктсаяс коллялiсны тöв, кодi некыдз эз кöсйы мунны: то петавлiс шондi, то лымъялiс, то вывтiасис тöвныр. Но чукöртчысьясöс тайö эз повзьöд. Гаж нуöдысьяс локтысьясöс бергöдлiсны йöввыв вежонö, кор найö ветлiсны чöсмасьны пöсь блинöн, кор тьöща чöсмöдлiс пöжасöн зятьöс да с.в. Сьылiсны челядьлöн и верстьöлöн котыръяс. Челядьлы гез кыскавны отсалiсны бать-мам да верстьö. Вачкасисны юрлöсъясöн, лэпталiсны гираяс. Кöч да Ур дорö котралöмöн чöсмасисны блинъясöн. Челядь да бать-мам окотапырысь ветлöдлiсны мичмöдöм вöв доддьын. Ворсiсны-ордйысисны и шöр школа дорын. Мöдöд класса велöдчысьяс да налöн бать-мам котрöдлiсны даддьöн öта-мöдсö, клюшкаöн новлöдлiсны мач.
Гаж вылын вöлiны Тöв и Тулыс. Тöв висьталiс, мый ветлас сэсся ылi войвылö, мед водзö му вылын ыджыдалас Тулыс. Бöръяыс кöсйысис, мый сывдас став лымсö, гажöдас дзольгысь шоръясöн, мича лунъясöн. 
Марина Дадашова.