Октябр 21-26 лунъясö Сыктывкарын мунö школаöдз арлыда челядьöс кык кывйöн велöдöм кузя международнöй семинар. Чукöртчисны сы вылö уна регионысь — Карелияысь, Марий Элысь, Удмуртияысь, Ханты-Мансийскöй да Ненецкöй автономнöй кытшъясысь, Комиысь да Таймырысь — воспитательяс да методистъяс. Ставыс матö 50 морт. Сёрнитiсны, кыдзи пыртны челядькöд уджö выльторъяс, семьяясöс таö тшöтш кыскöмöн.
Октябр 23 лунö семинарын петкöдчысьяс волiсны Кулöмдiнö. Райадминистрациялöн ыджыд залын нуöдiсны сöвещание, кöнi регионъясысь войтыр юксисны удж опытöн. Видзöдiсны юрсиктса «Голубок» садйын занятие. Садйöн веськöдлысь О.Кравченко тöдмöдiс асланыс уджöн. Танi кольöм восянь челядьöс велöдöны «Дзолюк» программа серти сöмын коми кыв вылын. Волiсны и «Нюм» садйö. Танi зонпосни коми кыв вылын петкöдлiсны сцена вывсянь ворсантор, сьылiсны-йöктiсны, лыддисны кывбуръяс. Гöсьтъяслы сьöлöм вылö воис челядьлöн гажöдöмыс, сöдз коми кывйöн сёрнитöмыс. Рытнас Выльгортысь «Мича аньяс» сьылан котыр нуöдiс налы «Рытпук» гаж, петкöдлiс коми обрядъяс.
Семинарыс юркарын мунас вежон помöдз.
Снимок вылын: «Голубок» садйö волiгöн (шуйгавывсянь): Финляндияысь Йоуни Сиркия, Карелияысь Наталья Антонова, Сыктывкарысь Зоя Остапова, Финляндияысь Аника Пасанен да «Голубок» садйöн веськöдлысь Ольга Кравченко.