Выль ыджыд йöрыш

Май 4 лунö Кулöмдiнса культура керкаö чукöртчылiсны юрсиктса гижысь Иван Иванович Ногиевлысь творчествосö пыдди пуктысьяс, шоныд кывъясöн пасйисны сылысь «Винегрет» книга петöм.

Медводз кыв шуисны гижысь йылысь, кодi тавося сентябрын кутас пасйыны 60 арöс тырöм. Парма грездын чужлöм морт Кулöмдiнса шöр школа бöрын помалiс Коми пединститут, велöдiс школаын, уджалiс милицияын, паспортöн могмöданiнын. Кыв шутöг, гижöдъясын висьталанторъясыс йитчöмаöсь аслас олöмын вöвлöмторъяскöд ― челядьдырсянь талунъяöдз. Челядьлы и верстьöлы торйöн нин воö челядьдырся шöр герой Евлоглöн олан руыс. Буретш сiйö öтувтö ичöтдырлы сиöм став гижöдсö. «Винегретын» ставыс 23 висьт да кык повесьт, и, дерт, челядьдырысь кындзи, сэнi эмöсь и муслуна том кад да верстьö олöма ордым.

Книгасö донъялiсны унаöн, и быдöн тöдчöдiс коми кывйöн бура вöдитчöм. Анатолий Александрович Попов: «Гижöма дзик миян Кулöмдiнса кывйöн», Нина Афанасьевна Попова: «Кывйыс ёна бур», Василий Григорьевич Лодыгин: «Лыддьысьысьтö верман кыскыны ас дорад сöмын мыйöнкö чуймöдöмöн. Иван Ивановичлöн чуймöдö тыр вир-яя коми кыв».

Пасйисны гижысьлысь шыöдчöм вылö кыпалöм, корöмлы воча мунöм. Торйöн нин радейтö сiйö аддзысьлыны челядьлöн котыръяскöд. Медводдза книгаыс, кодöс лэдзис «Евлог да сылöн другъяс» ним улын челядьлöн районса библиотека, сиöма буретш налы. Библиотекаяслöн котырöн веськöдлысь Галина Егоровна Пашнина висьталiс:

— Ми Иван Ивановичöс зэв ёна пыдди пуктам да радейтам, сы вöсна мый век мунö воча, öтарö аддзысьлö лыддьысьысьяскöд, торйöн нин челядькöд. Важысянь миянлы зэв бур ёрт. Кор панiм сёрни челядьлы книга лэдзöм йылысь, печатайтiс ставсö ачыс. Зэв нимкодь, мый сылöн петiс ыджыд книга, код йылысь сёрнитам талун. Мед петасны и мукöдъяс, кодъясöс окотапырысь лыддьöны миян районса йöз.

Комын во нин тöдö Иван Ивановичöс культура юкöнса уджалысь Ольга Андреевна Васильева, кодöс гижысь велöдöма Кулöмдiнса шöр школаын. Пасйис гижысьлысь шаньлунсö, сибыдлунсö, быдмысь йöзлы отсалöмсö.

«Парма гор» газетса главнöй редакторöс вежысь Николай Александрович Лютоев юöртiс, мый И.И.Ногиевлöн «вытьыс воссис» «Ленин туйöд» да «Парма гор» газетын йöзöдчöмöн, редакция век ышöдiс сiйöс да век сетiс позянлун йöзöдны выльöн чужöм гижöдъяс. Бöрынджык воссис туй «Войвыв кодзув» журналö. И со книга ― зэв ыджыд шедöдöмтор.

Ме ассянь содта, мый татшöм ыджыд кöрышыс, кутшöм петiс И.И.Ногиевлöн, абу весиг районса öткымын гижысьяслöн, кодъяс пырöны Россияса гижысьяслöн котырö. Колö кö быттьö тайö «членствоыс», Иван Ивановичлы тыр правоöн позьö шыöдчыны республикаса гижысь котырлöн правлениеö. Но, менам видзöдлас вылö, öнi, кор примитöны вель слабиник гижысьясöс, нимыслöн тöдчанлуныс вошис. Но тайö, кыдз шуласны, мöд сёрни нин.

Иван Ивановичлысь гижöдъяссö редактируйтöма, мöд ногöн кö, вайöдöма книгаöн лэдзны позянаöдз, Россия гижысьяслöн котырö пырысь поэт Евгений Козлов. Тайö уджсö вöчöма кывкутöмöн, колö висьтавны сылы аттьö, но Иван Иванович шуö, мый сылысь вежлавны нинöм эз ков. Но ме танi сыкöд öти кывйö ог во. Лöсьöдöны гижанноглöн корöм серти весиг профессиональнöй гижысьясöс, и таын нинöм лёкыс абу, сöмын бур вылö. Висьтъяс, кывбуръяс да мукöд гижöдъяс, кодъяс петöны, пример вылö, «Парма гор» газетын, ставныс мунöны менам синъяс да вежöр пыр. Кодöскö лöсьöдыштан муртса, кодöскö «гöран» эжа муöс моз, сы вöсна мый аньтуйыс этша на. Менсьым сьöлöмöс шонтöны Эдуард Тимушевлöн «Менам Велöдысьлы» кывъяс, кодъясöс сiйö гижöма меным козьналöм аслас кывбуръяса сборникъясö. Менам видзöдлас вылö, эз кö вöвны лöсьöдысьяс ― редакторъяс, эськö эз вöвны и гижысьяс.

Дона лыддьысьысьяс, чолöмалам асьнымöс сiйöн, мый миян районлöн да ставнас республикалöн лоис нöшта öти тöдчана гижысь, кодöс позьö орччöдны асланым жö сэтшöм гижысьяскöд (босьта сöмын проза), кыдзи Пётр да Борис Шаховъяс, Виктор Напалков, Михаил Игнатов, Степан Тимушев, Александр Ульянов. Кутам виччысьны сылысь выль гижöдъяс. Ачыс öд висьталiс, мый уджалö коймöд повесьт вылын. Дерт жö, гижас и висьтъяс. Чайта да, бара на артмас мывкыд сёрни, кор арнас пасъям сылысь «гöгрöс» олан тшупöдсö.

Василий ЛОДЫГИН.