Гортсянь вузасьöмысь

Медым öлöдны да дугöдны районын алкогольöн да спирт сораса юанторъясöн закон торкöмöн вузасьöм, полицияса уджалысьяс öтырышъя ветлöны сиктъясö да посёлокъясö. 2012-öд воын ветлiсны нин 15-ысь, мырддисны 2,8 литр спирт, кыскисны административнöй кывкутöмö вит мортöс да на вылö гижöдъяс мöдöдiсны судö.

Спирт сораса юанторъясöн тшöкыдджыка вузасьöны рытын да войын. Гортсянь спиртöн вузасьöм ― тайö закон торкöм. Стöча кö тöдмаласны весиг öтчыд, мый морт гортсяньыс вузалiс спирт, сiйöс кыскасны административнöй кывкутöмö Российскöй Федерациялöн административнöй мыж вöчöм кузя кодексысь 14.2 статья серти (закон торкöмöн тöвар, кодöс оз позь вузавны быдöнлы, иналöм). Вермасны вештöдны 1,5-2 сюрс шайт, вузаланторсö мырддьöмöн либö мырддьытöг. Мортöс кö кыйисны кыкысь, сiйöс кыскасны административнöй кывкутöмö Российскöй Федерациялöн административнöй мыж вöчöм кузя кодексысь 14.1 статья серти (пасйысьтöг либö вузасьöм вылö торъя тшöктöм босьттöг предпринимателялöм). Вермасны вештöдны 500-сянь кык сюрс шайтöдз.

Закон торкöмöн вузалöм спирт мырддьöм бöрын сiйöс мöдöдöны лабораторияö, кöнi видлалöны, эмöсь-ö сэнi мортлöн дзоньвидзалунлы омöльтор ваян сорасъяс. Кывкöртöдын кö пасъясны, мый сорасъяс эмöсь, спирт вузалысь вылö вермасны панны Российскöй Федерациялöн уголовнöй кодексысь 238 статья серти уголовнöй делö. Та серти вермасны вештöдны 300 сюрс шайт либö кык вося удждон, либö уджöдны 360 час, либö пуксьöдны дзескыдiнö 2 во кежлö.

Дмитрий ШИХ,

районысь полицияса начальникöс вежысь.