Пожöгын март 26-öд лунö дас öтиöдысь том йöз чукöртчасны ворсны «Йиркапысь». Быд котырö пырасны кык ныв да кык зон. Таво гажыс сиöма Россияын олысь унасикас кывъя войтырлöн пöль-пöчьяссянь вуджöм оласноглы да гажсö котыртысь шонъянöй нин Владимир Игоревич Шомысовлы.
Гажсö мöвпыштöма комияслысь олöм-кыйсьöмсö казьтыштöм могысь. Шöр могыс тöдмöдны том йöзöс пöль-пöчъяслöн оласногöн, сöвмöдны коми кыв дорö муслун, ывлавывса ворсöмъясö пырöдчöм.
Таво ворсöмыс мунас куим юкöнöн: öти — кыйсьысь Йиркаплöн кок туйöд мунöм, мöд — коми ворсанторъяс да мастер классъяс, коймöд — юр вем песöм.
Быд котыр пуктö аслыс ним да висьталö нырнуöдан мöвп. Нöшта ставныслы колö пасьтавны гынсапöг либö унты. Бытьöн котыръяслы колö босьтны лямпа гоз, ноп, чер, спички, сюмöд, компас да бурдöдчанторъяс (бинт, жгут, нашатырнöй спирт, зелёнка да йод). Вермысьяслы вичмас диплом да козин. Нöшта — медводдзаяслы вуджысь кубок.
Гажсö нуöдысьяс виччысьöны 6-7 котыр. Пырöдчыны вермö 18-35 арöса быд окотитысь, сöмын март 22-öд лунöдз колö гижны шыöдчöм да ыстыны том йöзкöд уджалан юкöнö Кулöмдiн Набережнöй улича 30-öд керка, либö uktomlun@mail.ru электроннöй адресö. Нöшта бурдöдчанiнысь босьтны öдйö паськалан висьысьяскöд йитöд йылысь справка. Йитчыны котыртысьяскöд позьö 93-5-62 телефон пыр.
Дасьтiс Татьяна Чувьюрова.