[ A+ ] /[ A- ]
- Сöмын öнi, культура керкаö уджавны пырöмöн, кутiсны збыльмыны томдырся кöсйöмъясöй, — тадзи панiс сёрнисö Валентина Дмитриевна Холопова.
Ань чужис Ручын Мария Давыдовна да Дмитрий Михайлович Холоповъяслöн ыджыд семьяын, 6 чоя-вока пöвстын. Ичöтдырся кадыс, 8-öд классöдз велöдчöм колины ас сиктын. А сэсся лэччис юркарö, пырис Сыктывкарса öтиöд номера педучилищеö, кöсйис лоны черчение да рисование велöдысьöн. 1983-öд воын помалiс, да том специалистöс ыстiсны Нюмыдö велöдны челядьöс начальнöй классъясын. Ньöти эз кöсйи мунны сэтчö, весиг кык тöлысь кежлö пыравлiс уджавны культура керкаö. Но районса велöдан юкöнсянь тшöктiсны мунны быть. Öти во и велöдiс ичöт челядьöс Нюмыдын, а сэсся бергöдчис чужанiнас, босьтчис уджавны школаын аслас специальносьт серти. Кык во мысти корисны садйö, кöнi 10 во вöлi воспитательöн, 21 во — веськöдлысьöн.
Лöсьöдiс семья, öта-мöд бöрся чужис куим ныв. Найö петiсны нин ас олöмö, ыджыд бать да ыджыд мамлöн котралöны нёль внучка.
Ёна пö вöлi кöсъя велöдны челядьöс мичаа серпасасьны, вöчасьны унаторйысь, кысьыны. Öнi пö ме дзик аслам местаын, да аттьöалö культура керкаöн веськöдлысь Надежда Михайловна Подюковаöс корöмысь. Челядькöд уджыс сьöлöм серти. Эз öд прöста уджысь орöдчывтöг велöдчы Коми пединститутын, нöшта лоис и школаöдзса арлыда челядьöс велöдысьöн да психологöн.
Со и бать-мам да ас сиктса зарни кияса Илья Андреевич Попов отсöгöн кружокö ветлысь нывка да зонкаяслöн лоисны мольбертъяс. Серпасасьöны окотапырысь, нöшта вöзйысисны сьывны да йöктыны гажъяс дырйи. Медся водзмöстчысьясыс — Юля Чаплыгина, Тимофей Попов, Алиса да Ирина Поповаяс, Софья Булышева, Марианна Липина, Люба Карманова да Ксюша Мосичук. Петавлiсны нин сцена вылö мамлы сиöм гаж дырйи «Сударушка» котыркöд, йöктiсны.
Валентина Дмитриевна висьталö, Ручын пö уна кужысь йöзыд, и верстьö кöсйöны мыйкö да вöчны. Кутшöм мича сундукъяс артмисны аканьяслы, важдырся кодьöсь. Тырмымöн и енбиа челядьыс, локтöны кыпыд руöн. Асьтö пö кылан коланаöн, да окота велöдны найöс, юксьыны сямöн. Уджалöны, а костъясас удитöны тэчны ЛЕГО, ворсыштны, мыйöнкö да и ошйысьыштны. Юрын пö уна мöвп бергалö, окота пö велöдны кыны мича шаль, вышивайтны салфеткаяс. Унаöн юасьöны, но став вылас кадыс оз вичмы на.
Ань ачыс радейтö петкöдчыны конкурсъясын, ышöдö и челядьöс. Нывкаяс да зонкаяс районса конкурсын асланыс серпасъяснас вöлiны вермысьяс лыдын. А öд Валентина Дмитриевна уджалö сöмын на воысь муртса дырджык.
Ёртасьö спорткöд, котралö лыжиöн, ветлö скандинавия бедьясöн, ворсö пионерболысь. Неважöн «Пожöма яг» турбазаын сдайтiс ГТО-лы урчитöмторъяс, босьтiс зарни пас.
Радейтö дзоридзьяс, и гортса, и ывлавывсаясöс. Керка гöгöрыс тыр уна сикас дзоридзöн.
Культура керкаö аскöдыс вайлö медводдза классын велöдчысь Александра внучкасö. Код тöдас, колöкö, сiйö мунас ыджыд мамыслöн кок туйöд.
Миянлы, верстьöлы, окота тшöтш мыйöкö велöдчыны, мыйкö вöчавны. Шоныд жилет кыим нин, колö сöвмыны водзö. Но миянкöд уджавны аньлöн оз тырмы кадыс, став вынсö да сямсö сетö челядьлы. Мед и водзö Валентина Владимировналöн пöртсяс олöмö став кöсйöмыс, мед уна нимкодьлун ваясны сыöн да челядьöн вöчöмторъясыс, нывкаяслöн да зонкаяслöн серпасъясыс лоасны медся бурöсь и республикаын.
Екатерина Ульнырова.
Снимок гижысьлöн.
Комментарии: