— Медым кывны асьтö дзоньвидзаöн, колö медводз бура сёйны-юны. Тэрмасьтöг куимысь лун. Абу бур ваöн кос сёян кылöдöм, мыйöн öнi ышмöны челядь и томъяс. Татшöм сёяныс лёка пуксьö кынöмö да дзоньвидзалунлы вайö сöмын лёк. Пусьыны-пöжасьны колö кыпыд руöн, торйöн нин кöтны нянь. Сэки ставыс артмö чöскыда, — пасйис Кулöмдiнса сельполöн юрсиктса сёянiнын пусьысь-пöжасьысь Ольга Степановна Тимушева.

Водз асылын босьтöны нин войын дасьтöм быдсикас пöжас да машинаöн разöдöны сельполöн районса лавкаясö. О.С.Тимушеваöн да сыкöд уджалысьясöн дасьтöм пöжалöмторъяс век эмöсь и юрсиктса сёянiнö волысьяслы. Насянь быд лун кылöны аттьöалан кывъяс.
— Ольга Степановна уджалö медся дыр, водзмöстчö. Ме Н.А.Липинакöд ветлi велöдчыны, рудзöг нянь велöдiсны пöжавны финнъяс. Чуйдi и О.С.Тимушевалы да пыр жö артмис зэв чöскыд нянь. Велöдчöм бöрын жö, велöдi, кыдзи вöчны чериысь да яйысь выльпöлöс сёян, кыдзи уна йöза чукöртчылiгöн мичмöдны пызан выв. Аньöс бура уджалöмысь пасйисны почёт грамотаöн, аттьöалан гижöдöн. Ставным зiлям, мед сёян-юан быдöнлы воис сьöлöм вылас, — кывкöртiс сёянiнöн веськöдлысь Е.А.Логунова.
Гижöд да снимок Марина ДАДАШОВАЛÖН.