Неважöн на телепонöн йитчывлі Ручысь Дмитрий Александрович Поповкöд да чолöмалі республикаса ордйысьöмын вермöмöн. Омöля аддзысьяслöн котырсянь (ВОС-сянь) ветліс Воркутаö да варччысьяслöн вермасьöмын петіс коймöд местаö. А таöдз вöлі юркарса бассейнын ордйысьысьяс лыдын, Раиса Сметаниналöн стадион вылын котраліс лызьöн. Вермытöмъяслы Кулöмдінын быд котыртлöм вылö волывлö бура дасьтысьöмöн: сюся ворсö шашкиöн да пызанвывса теннисöн, лыйсьö пасö (Дартс вермасьöм), быдлаын петкöдчис буръяс лыдын.

— Ме чужи, быдми да ола Ручын, помалі татчöс шöр школа, сэсся — Визинын училище, лои туй вöчан техника дзоньталысь механикöн. Но синъяс висьöмöн эг кут прамöя аддзыны да ковмис уджысь эновтчыны. Код тöдас, кутшöм олöмö вои, эз кö омöля аддзысьяслöн котырсянь (ВОС-сянь) чуйдыны спортö туй. Медальыс да почёт грамотаыс чукöрмис уна нин. Аслым любö. Аттьö висьтала Ручса юралысь Е.Н.Поповалы, коді машинаöн отсалö районса кöть республикаса ордйысьöмъяс вылö ветлігöн. Спортыд менö вöчис пелькджыкöн, повтöмöн, винёвджыкöн да вынаджыкöн.

Тöдöмысь, тадз. Дмитрий олö ас керкаын да став гортса уджсö вöчö ачыс. Радейтö вотчыны, зіль мортыд вöчö корöсь гозъяс весиг йöзлы.
/ттшöтш казьтышта мöд мортöс, кодлöн олöмыс бурланьö вежсис спорткöд ёртасьöмсянь жö. Валентин Васильевич Липин Дереваннöйысь. Синтöммис школаын велöдчигас на, кор картупель керигöн öта-мöдлы лыйсигöн доймис да витöд классянь ковмис шыбитны велöдчöмсö. Жугыля колис челядьдырыс и том кадыс. Бара жö омöля аддзысьяслöн котырсянь чуйдöмöн кутіс ёртасьны спорткöд да вöлисти аддзис выль ёртъясöс, прöст кад пöльзаöн коллялöмöн дзоньвидзалунсö бурмöдö. Кулöмдінса «Олимпик» ёнмöдчанiнö сійöс некод оз новлöдлы, ачыс корсьö машина да оз кольлы волытöг ни öти котыртöм. Радейтö ворсны пызанвывса теннисöн, шашкиöн, котравны лызьöн, лыйсьыны пасö, уявны бассейнын да мукöдтор, районса да республикаса ордйысьöмъяс вылын шедöдö вермöмъяс. Гортас быд лун петавлö туйö скандинавия бедьясöн да мунö вит километрысь оз этшаджык. Ставöн нимкодясим, кор Валентинлы морöсас пысалісны ГТО-лысь зарни пас. Аддзысьлöмъяс вылö чукöртчылігъясын миянöс да ас кодь ёртъяссö чöсмöдлö пöжасъясöн. Олö öтнас, некутшöм уджын оз йöрмы, велалöма тшöтш чöскыда пусьыны и пöжасьны. Пусян-пöжасян дозмукыс сылöн омöля аддзысьлы вöдитчыны кивыв, сёрниöн висьталö кадсö и ладсö да.

 Вермытöмъяслысь спортöн олöм бурмöдöмын ыджыд удж вöчö спорт шöринын уджалысь, инструктор Виктория Сергеевна Тимушева. Улöдз копыр сылы.

Лёка аддзысьяслöн став Россияса котырлöн республика котырысь Кулöмдін районса юкöнöн веськöдлысь Наталья Логинова.

Спорт шöринлöн снимок вылын: шуйгавывсянь коймöдыс В.В.Липин да нельöдыс Д.А.Попов.