Ва вылын ветлысь-мунысьясöс неминуча суöмысь видзöны-öлöдöны ичöт суднояс госинспекциялöн районса юкöнын уджалысьяс. Матö 20 во нин сыöн веськöдлö старшöй госинспектор Иван Борисович Попов. Кольöм вося уджлöн кывкöртöд серти республикаын лоис медбурöн да босьтiс вермысьлысь кубок. Сiйö вичмис мöдысь нин. Иван Борисовичöс бур уджысь пасйылiсны видзчысьтöм лоöмторъяс министерствосянь «Маршал Василий Чуйков» медальöн, сетiсны федерацияса да республикаса ичöт суднояс госинспецияын отличник ним, почёт грамотаяс да аттьöалана гижöдъяс.

Иван Борисович ичöтсянь радейтiс кыйсьыны-вöравны. Чужис Керчомъяын. Служитiс Германияын, а сэсся велöдчис Коми пединститутын. Гöтрасис ас сиктса ныв вылö. Гозъяöс олöмыс вайöдiс Зимстанö. Водзмöстчис комсомол комитетын, методистöн леспромхозса спорт юкöнын, веськöдлiс батьтöм-мамтöм Зимстанса челядь керкаöн. Кад кольöм бöрын семьяöн вуджисны Кулöмдiнö. Пырис уджавны йöзöс социальнöя доръян районса шöринлöн юкöнö. Чужтiсны да ас олöмö петкöдiсны кык пиöс. 2005-öд воын Иван Борисовичöс корисны веськöдлыны ичöт суднояс государственнöй инспекциялöн районса юкöнöн. И пыр на сэнi.

Инспекторъяс тöлын петавлöны йи вылö чери кыйысьяс дорö, корöны кутчысьны урчитöмторъясö. Тулысын, ва воссьöмöн, уджыс тöдчымöн содö. Районса олысьяс ньöбöны выль пыж. Сiйöс, кыдз и машинаöс, колö пасйыны налöн юкöнын. Нöшта бытьысь донъялöны ва вылын кутчысян правилöяс кузя тöдöмлунъяс да сетöны удостоверение. Котырын зiльысьяслöн тöд вылын став пыжыс, видзöдöны шогманаöсь-ö найö да моторныс ва вывтi ветлöм могысь, нуöдöны сiдз шусяна техосмотр. Сикт-посёлокъясын шойччан да купайтчанiнъяс тшöтш жö налöн дöзьöр улын. Гожöмнас тшöкыда позьö аддзыны котырын зiльысьясöс ва дорын.
Ыджыд тöдчанлун сетöны и челядькöд уджлы. Гожöмнас найö кольöны ас кежсьыныс. Во гöгöр чöж инспекторъяс сёрнитöны накöд урокъяс вылын. Висьталöны, мый гырысьястöг оз позь лэчыны ва дорö. Сеталöны öлöдан гижöдъяс, корöны кывзысьны бать-мамлысь.

Татьяна Чувьюрова.

Снимок гижысьлöн.