Уджалам ёртасьöмöн 

 «Парма гор» газетлöн редакция топыд йитöда уджалан котыръясöн веськöдлысьяскöд да сикт-грездъясса олысьяскöд, лыддьысьысьяскöд.

 Видз-му овмöс юкöнöн веськöдлысь Анастасия Ревокатовна Яровакöд волiм грант босьтысь став крестьянин овмöс кутысь дорö да кооперативö. Пыр гижö гöра-кöдза кежлö дасьтысьöм да пуктысьöм, град выв пуктас идралöм, бур уджалысьяс йылысь, таво семьялы сиöм воын тшöтш и видз-му овмöсын зiльысь семьяяс йылысь.

 Газетлöн лист бокъясын петöны Дiасёръяса клублöн да библиотекалöн öтувъя уджалöм, челядьöс, олысьясöс да ветеранъясöс наöн нуöданторъясö ышöдöм, велöдысьяс, пыдди пуктана йöз, посёлоклöн история, аскиа уджсикас бöрйыны отсалöм могысь велöдчысьяслöн студентъяскöд аддзысьлöм, торъя военнöй операцияö пырöдчысьяслы отсалöм да мукöдтор йылысь гижöдъяс. Водзмöстчö библиотекаын уджалысь Елена Викторовна Курочкина.

 Дiасёръясянь жö уна во нин гижö Нина Егоровна Шатохина. Нимöдö юбилей пасйысь ветеранъясöс, олöмаяслöн котырлöн спортö да мукöд нуöданторйö пырöдчöм йылысь. Газеткöд ёртасьö важöнсянь нин.

 Газетлöн матö быд петасын Ручысь Екатерина Анатольевна Ульныровалöн пасйöдъясыс. Гижö ветеранъяс, том йöз, том да уна во нин олысь гозъяяс, спорткöд ёртасьöм, вöр-валöн аслыспöлöслун, важся олöм, сиктöн да районöн нуöданторъясö пырöдчöм йылысь, туйвыв пасйöдъяс.

 Миянкöд ёртасьö и Кебанъёльысь Нина Николаевна Плескач. Гижö олöмаяслöн Кебанъёльса котыр, тыр арлыдтöмъяслöн социальнöй реабилитация юкöнлы отсасьöм, спорт шöринöн балаяс збыльмöдiгöн нуöданторъясö пырöдчöм, ветеранъяс да юбиляръяс йылысь.

 Улыс Вочысь Валентина Александровна Ширяева сöстöм коми кывйöн петкöдлö сиктыслысь аслыспöлöслунсö, сиктлысь олан туйсö, зiль йöзöс. Семьялöн воын нимöдö öтув дыр олысь семьяясöс.
Улыс Вочысь жö отсасьö библиотекаса уджалысь Людмила Анатольевна Ульдрикас. Гижö пыдди пуктана йöзöс, сиктлысь историясö.

 Йöзöдчыны босьтчис и Скöрöдумса библиотекаын уджалысь Юлия Николаенва Королева. Сылöн гижöдъясысь тöдмалам библиотекаöн нуöданторъяс, ветеранъяслöн удж, сиктын кыпыд лоöмторъяс да нуöданторъяс йылысь.

 «Районканымöс» оз вунöд олöмаяслöн Кулöмдiнса котырöн веськöдлысь Валентина Петровна Нестеренко, олöмаяслöн Кужса котырöн веськöдлысь Альбина Васильевна Логинова, велöдан управлениеысь Наталия Николаевна Нестерова.

 Лыддьысьысьяслы сьöлöм выланыс воисны Помöсдiнысь Николай Васильевич Игнатовлöн да Кулöмдiнысь Иван Иванович Ногиевлöн шмонь висьтъясныс, Кулöмдiнысь Александр Михайлович Шаховлöн, Скöрöдумысь Александр Егорович Уляшевлöн, Помöсдiнысь Мария Шомысовалöн, Сыктывкарысь Анна Кучевалöн кывбур-висьтъяс. Гижöны и мукöд. Ставныдлы ыджыд аттьö, виччысям тiянлысь гижöдъяс, ёртасям водзö.
Марина Дадашова.
Снимокъяс öтуввезйысь.