«Экология» национальнöй бала серти мунысь «БумБатл» акцияö пырöдчöны и миян районсаяс. Ковтöм бумага позьö инавны Кулöмдiнса лесничествоö ноябр 15-öд лунöдз на.

 Вайисны нин тыр арлыдтöмъяслöн социальнöй реабилитация юкöнысь челядь. Тайö велöдчысьяслöн важ тетрадьяс, книгаяс да бумагъяс. Улыс Вочса олысьяслысь макулатура вайис библиотекаса уджалысь Людмила Анатольевна Ульдрикас.

 — Юöрсö лыддим асланым «Парма гор» газетысь. Менам эмöсь зэв водзмöстчысь челядь волонтёръяс, тайö Александр Морохин, Илья Мальцев, Василиса Ульдрикас, Анна Чаланова, Ирина Касева да Юрий Лодыгин. Налы висьталi, а найö сэсся юöрсö разöдiсны водзö. И челядь ваялiсны, кодкö да бать-мамыскöд. Томъяс пиысь нырччис Наталья Михайловна Ельцова, олöмаяс пиысь Валентина Александровна Ширяева, Конкордия Ивановна Ванеева, Галина Фёдоровна Логинова. Йöз шуисны, мый тайö уджсö колö нуöдны пыр, мед некöн нинöм эз туплясь, да гöгöр вöлi сöсöтöм. Ми пионерсянь комсомолöдз чукöртлiм макулатура, кöрт, пöим, и сетлiсны сьöм, да школаса нуръясянiнысь ньöблiм чöскыд аладдя. И ог вунöдöй тайö бурсö. Чукöрмисны важ тетрадьяс, газет-журналъяс, но ёнджыкасö небöгъяс, тшöтш и библитотекаысь важъясыс. Ставсö торйöдi, «Правда» газетысь аддзи история йылысь зэв колана статьяяс, да кольöдi, — сёрнитiс Людмила Анатольевна.

 Дерт, уджö босьтчытöдз Людмила Анатольевна ветлiс садйö, сёрнитiс шыблас торйöн чукöртöм йылысь. Лыддис вöр-ва видзöм йылысь небöг, а сэсся ворсiсны. Велöдчысьяслы вöлi кино, кöнi петкöдлiсны шыбласысь мыйкö мöдтор вöчöм да овмöсын, стрöитчöмын налöн коланалун йылысь.

 Библиотекаö ковтöм бумаг вайысьясöс юктöдiс чайöн да ассяньыс сетiс неыджыд козин. Вочсаяс и водзö на чукöртöны. Кадыс эм на. Лоас пö бур, водзö вылö кö макулатура примитысьяс воласны сикт-посёлокъясöдз, автобусöн пö унасö он вай, да и машинаыд абу на быдöнлöн.
Марина Дадашова.
 Снимокъяс Людмила Ульдрикаслöн да Наталья Тарабукиналöн.