Водзтi Кулöмдін районлöн газет петіс редакциялöн да типографиялöн öтувъя уджöн. Ме пыр жалиті типографияса нывбабаясöс да нывъясöс — уджыс сьöкыд, няйт, и уджаланінныс пыр вöлі кöдзыд. Некор оз вун: сöмын на примитісны редакцияö, редактор ыстіс менö типографияö тöдмасьны. Öти нывбаба, медся збойыс, бöрынджык сэсся Клавдия Александровна Чисталёва котырас вöлі медся дыр уджалысьыс да уналы бур велöдысьöн, бандзибъясöс чепöльтіс: тадз пö ас йöзö примитам. А кор петі бöр редакцияö, ставöн вак-вакöн серавлісны да сетісны рöмпöштан ас вылö видзöдлыны. Чужöмöй сьöд краскаöн мавтöма, повзьöдчысь кодь. Найö татшöм благöслöвитöмтö, вöлöм, тöдöны нин, асьныс та пыр мунлöмаöсь.

 Типографияса коллектив пыр вöлі уджач, но и кужисны шмонитны. Тайö, тыдалö, сьöкыдлунъяссö венны тшöтш отсаліс. Газет чукöртісны, сідз шусяна, кассаысь торйöн быд кöрт шыпас ас местаас пуктöмöн, а кор нин артмис дзоньнас лист бокыс татшöм кöрт шыпасъясысь, колö вöлі новлöдлыны öтилаысь да мöдлаö, кытчöдз оз во газет печатайтан машина вылö. Татшöм вöлі газет вöчан уджыс. А сэсся кöрт чукöра лист боксö кымынысь швачöдісны пу мöлöтöн, медым ставыс лöсяліс, корректор лыддьöм бöрся корсялісны да правитісны öшыбкаяс, кымынысь мавтісны сьöд красканас, медым гижöдъясыс бура тыдалісны. Бöрынджык нин лоисны линотип машинаяс, коді лэдзис кöрт шыпасъясысь дзонь кывчукöръяс.

 Став тайö серпасыс тöдса Галина Николаевна Лютоевалы, коді 21 во уджаліс типографияын да веськавліс быд цехö, кужис шыпасъяс öктыны, лист бокъяс тэчны, верстайтчыны. Полиграфистъяс газетысь öтдор вöчисны зэв уна мукöд бланок да документ, брошюра, плакат. Воліс училище помалöм бöрын типографияын уджалысь специалистöн зэв на томöн. Татшöмъяс лыдысь кодсюрö повзисны сьöкыдлунысь да мунісны мöдлаö. Галина Николаевналысь некор эг кывлöй пышйöм йылысь сёрни. Семьяöн олöмöн нин кöть ковмывліс кольччывны сёр рытöдз, кытчöдз оз эшты газет вöчöмыс.

 Эг кужлöй мöвпыштны, мый типографиялöн бырас удж. Компьютер ас вылас босьтіс выльногöн печатнöй прöдукция лэдзöм, предприятие тупкысис, йöзыс корсисны выль удж. Галина Николаевналы вöзйисны кольччыны редакцияö корректорöн. И бара 21 во колис тайö удж вылас.

Аддзысьлігъясöн сёрнинаным вуджлам типографиялöн уджалан воясö, казьтывлам ёртъясöс. Некор оз вун, мый вöлі öтувъя удж, öтув шойччан кад коллялöм, семьяясöн öта-мöд ордö волывлöм, челядьлöн быдмöмöн нимкодясьöм. Став бурсö, Галина Николаевна, и водзö олöмад!
 Нина Буткина.
Снимок Галина Лютоевалöн.