Дежуритан юкöнö кö юöртöны кутшöмкö мыж вöчöм кузя, лун кöть вой туйö пыр жö петö туясьысьяслöн да оперативникъяслöн котыр, сэтчö пырö и дознаватель. Сёрнитöны шыöдчысьыскöд, лоöмторсö аддзылысьяскöд, туясьöны. Пытшкöсса делöяс министерстволöн Санкт-Петербургса университетын буретш дознавательö велöдчöм бöрын районö бергöдчис Озъягысь Александра Сергеевна Скрыгонюк да кык во нин зiльö бöрйöм специальносьт серти. Уджыс пö сьöлöм серти. А ышöдiс Фёдор Сергеевич вокыс, кодi уджалö пытшкöсса делöяс министерстволöн районса юкöнын. Ачыс и вайöдiс уджалысьясöс бöръян юкöнö.

 Ныв водзмöстчис школаын велöдчигöн, тшöтш и университетын. Бура велöдчис, вöлi юкöнса командирöн. Колiгöн курсантъяс медводз шыöдчылiсны сы дорö. Кужис öтувтны ас гöгöрыс, корсьны петан туй. Мöдöд вонас тöдмöдiсны участокса уполномоченнöйлöн уджöн, да Санкт-Петербургас жö практика вылын полиция юкöнын донъялiсны тайö туйвизьын тöдöмлун да сям. Нёльöд да витöд вонас пыдiсянь тöдмöдiсны дознавательлöн уджöн. Нёльöд вонас жö тайö карын практикуйтчис дознание юкöнын, отсасисны да öтув уджалiсны дознавательяскöд.

2022-öд вося августсянь ачыс нин босьтчис нин уджö. Туйдiсны-отсалiсны ыджыд сяма уджалысьяс, и öнi на колiгöн нюжöдасны ки.

 — Мыж кузя позьö нин гöгöрвоны, кодi сiйöс вöчис. Грабитiсны вузасянiн. Быд туясигöн эксперт босьтö чунь туйяс, да пыр жö видзöдам юöръяс öтувъя видзанiнö, лöсялö-ö водзтi пукавлöм йöзлöн чунь туйясыскöд. Лавка кутысь висьталiс, мый петкöдiсны öрекъяс, някляланторъяс, сёян-юан. Видеокамерасö видзöдiгöн тыдовтчис, форточкаöд пыралiсны тыр арлыдтöмъяс. Мöд лавкаысь гусялiсны спирт сораса юанторъяс, кассасьыс сьöм. Бара видеокамера петкöдлiс, лöмöн лавкалысь бöрладор öдзöссö жугöдöм пыралiс водзтi пукавлöм морт. Сьöмсö босьтiм керкасö шобигöн, штопъясыс вöлiны кушöсь нин. Быд мыж серти вöчам кывкöртöд, ми и панам уголовнöй делöсö, — сёрнитiс талун старшöй дознаватель нин Александра Сергеевна.
Марина Дадашова.
Снимок Елена Скрыгонюклöн.