Сентябр 26 лунö райадминистрацияын вöлi «Биур» паса чукöртчылöм, кодöс сиисны туристалöмлöн ставмирса лунлы. Коми республикаса экономика сöвмöдан министрöс вежысь О.И. Конакова, «Сан-Дали» туристалан агентствоысь петкöдчысь Л.А.Сычёва, районса юралысь Д.А.Шатохин, райадминистрацияысь общественносьткöд йитöд кутан да том йöзлöн туйвизь юкöнысь медшöр специалист Ю.С. Малышева, Керчомъяысь «Визув» котырысь петкöдчысь М.А.Гичева, Дереваннöйса шöр школаысь велöдысь М.А. Нестерова да мукöд кывкутысь йöз «гöгрöс пызан» сайын сёрнитiсны, кыдзи да кутшöм туйвизь серти сöвмöдны районын туристалöм, мый та кузя талун вöчöма нин да мый нöшта колö вöчны. Туристалан туйяс восьтöм могысь миян эм став позянлун, öд район озыр мича да тöдчана инъясöн, кыдз Ульянаса манастыр, Кадам да Дон тыяс, Екатерининскöй канал да с.в. Л.А.Сычёва сёрнитiс Сыктывкарса «Сан-Дали» туристалан агентстволысь Кулöмдiнын филиал восьтöм йылысь, пасйис, кутшöм могъяс кутас пöртны олöмö. Культура керкаын вöлi туристалан лунлы сиöм ыджыд гаж, кöнi петкöдчисны татчöс да юркарса сьылан котыръяс. Гаж дырйи районса юралысь Д.А.Шатохин вичмöдiс «Сан-Дали» туристалан агентствоöн веськöдлысь Л.А.Сычёвалы юрсиктын филиал улö сетöм жырлысь «зарни» ключ. Сыктывкарысь «ВечерОК» журнал котыртлiс дон босьттöг лотереяöн ворсöм. Вермысьяслы вичмисны козинъяс да журнал вылö во джын кежлö гижöдчöм могысь сертификатъяс. Медыджыд козин, велосипед, вичмис Дереваннöйысь Александр Николаевич Кирушевлы. Галина Нестерова. Авторлöн снимок вылын: А.Н.Кирушев сетöм козинöн.