ЫДЖЫДСЬЫС-ЫДЖЫД ГРЕК

Июль 9-15 лунъясö республикаын, тшöтш и миян районын, мунас «Козьнав меным олöм» пас улын абортъяслы паныд сулалöм. Такöд йитöдын лöсьöдöм котыр урчитìс вöчны унатор, сы лыдын шуны пыдìсянь мöвпыштöм кывъяс и «Парма гор» пыр. Талун сетам кыв Кулöмдìнса Петыр-Павел вичкоса уджалысь Ольга Антоновалы.

Сёрни талун аборт — ыджыдсьыс-ыджыд грек йылысь, кодлы паныд аслас став позянлунöн сулалö вичко. Вужйыс сылöн пыдын. Египетса фараон, кодì кöсйис бырöдны еврейясöс, тшöктылìс бабитчысь аньяслы: «Кор тì кутанныд вайсьöдны еврейкаясöс, то чужас кö пи, то виöй сìйöс, а ныв кö — мед олö». Бабитчысьяс эз пöртны олöмö фараонлысь тшöктöмсö, эз виавны пиясöс, сы вöсна мый фараонысь серти ёнджык полìсны Енлöн мыждöмысь.

Галатъяс дорö шыöдчöмын апостол Павел лыддьöдлö грекъяс, кодъяс оз лэдзны Енлöн сарствоö. На лыдын кага вианторъясöн вöдитчöм. Миян кадö ёна майшöдлöны контрацептивъяс, кодъяс оз лэдзны артмыны кагалы да лоöны кагаысь мынтöдчан кодь жö грекöн.

Тшöкыда шуöны, мый кынöмысь кага вöтлöм — сöмын нывбабалöн мыж. Но збыльвылас абу сöмын сылöн. Мыжыс уналöн. Пример вылö, верöслöн либö айловлöн, кодì тшöктìс вöчны аборт либö жö нинöм эз шу паныд. Мыжаöсь бать-мам, кодъяс ас выланыс оз босьтны содтöд тöждлун. Мыжаöсь матыссаяс, кодъяслы веськодь нöбасьысь рöдвуж. Мыжаöсь суседъяс, кодъяс аддзöны сöмын йöзöс. Мыжа пöдругаыс, кодì, гашкö, весиг сетìс аборт вылö сьöм. Мыжа врач, кодì вöчис абортсö.

Кöвъялöны мöвп, мый кымын унджык семьяын челядь, сымын овны сьöкыдджык. Гашкö, быдтысигöн и сьöкыдджык, но бöрыннас вермас лоны ыджыд бур, мортыс нимöдас оз сöмын асьсö, но и странаöс, став мирсö. Менделеев семьяын вöлì дас сизимöдöн, Пирогов — дас коймöдöн, Циолковский — дас öтиöдöн.

Лоысь мортöс виöмöн шудаöн лоны он вермы. Найö, кодъяс мынтöдчöны кагаысь, кызвыннас нэм чöжыс öткаöсь, либö найöс оз пыдди пуктыны бöрынджык чужöм челядь да с.в. Тадзи мыждö найöс Ен.

Нывбабаяс кызвыннас мынтöдчöны кагаысь сы вöсна, мый полöны сьöкыдторъясысь: олöны судзсьытöма, колö на велöдчыны, абу верöс, ачыс ичöт арлыда да с.в. Артмö, мый найö мöвпалöны сöмын ас йывсьыныс, а обществолöн ли государстволöн олöмыс налы веськодь.

Òтчыд лоис татшöмтор. Локтìсны вежа ай дорö гозъя.

— Вежа айöй, — шыасис нывбаба. — Ме сьöктì, а миян сìдз нин нёльöнöсь, чужас кö витöд — быдтыны ог вермöй. Шуöй ньылыд кыв да ме мынтöдча кынöмысь.

— Гöгöрвоа, мый тìянлы овсьö сьöкыда, — вочавидзис вежа ай. — Ме шуа ньылыд кыв, мед виинныд кынöмсьыныд каганытö. Но сöмын виöй ыджыд нывнытö. Сылы öд дас вит арöс да олыштìс нин му вылын, мыйсюрö аддзылìс, а кынöмса кагаыд весиг шондì югöр на эз аддзыв. Оз ло мортногсöн тадзитö.

Нывбаба тупкис чужöмсö кияснас да ырзöмöн бöрддзис.

Налы, кодъяс мынтöдчисны кагаысь, колö корны Енлысь прöща, каитчыны да вайны кагаясöс, позьö на кö арлыд серти. Налы колö висьтавны мукöдлы, мед эз вöтлыны кынöмысь, а быть чужтìсны кагаясöс, мед быть чужтìсны найöс асланыс нывъяс. Сöмын тадзи вермас прöститны Ен.

Мый кынöмысь кага вöтлöм — ыджыдсьыс-ыджыд грек, колö сёрнитны да вайöдны йöзлöн вежöрöдз верстьö пиысь ставлы. Колö сетны грекö вöйны вермысь мортлы сьöлöм, медым сìйö мыжсö эз вöч. Мукöддырйи тырмымöн сетны некымын рузум, медым нывбаба эз мынтöдчы аслас виртусьысь. Вай жö ог сетöй вöчны грексö некодлы да тадзи доръям асьнымöс, нимкодясям Енмöн сетöм олöмöн.