Сылöн медся сöстöм

[ A+ ] /[ A- ]


Ягкöджысь Вера Вениаминовна Синотова кывкутö ва босьтанiнъяс вöсна, кодъяс «Шоныд сетан Коми компаниялöн» Кулöмдiн юкöнса Помöсдiн участок улынöсь. Ань ас кадö эськö велöдчылiс вурсьыны, но тайö специальносьт серти посёлокын уджыс абу. Вöзйисны ваöн могмöдысьлысь удж. Кöть сiйö ёнджык лöсялö айловлы, но ковмис босьтчыны быть. И уджалö 13-öд во нин. Сылöн видзöдлас улын вит ва босьтанiн да кык ва башня. Быд лун кытшовтö найöс, мед видзöдлыны, ставыс-ö лючки, оз-ö мыйкö падмöд йöзöс ва босьтöмысь, сы вöсна мый колонкаяс важöсь. Кыткö кö жугалас, пыр жö чукöстö Помöсдiнысь специалистъясöс. Сьöкыдджык тöлын. Сэки колö весавны ва босьтанiнö воöдчан туйяс, удж вылö петны водз, мед йöзлöн локтöдз вöлi дась. Ёна кöдзыдъяс дырйи овмöссö ковмылö кытшовтны луннас кыкысьöдз, видзöдлыны, мед некытi эз кынмы. Öтчыд босьтчöма нин вöлi кынмыны ва трубаыс да ковмис матö войбыд шонтавны, сывдыны бöр. Гожöмын кокниджык, но ань весь оз ов: пелькöдö, мавтö-мичмöдö ва босьтанiнъяслысь пытшкöссö, синъяслы гажа.
— Ме слесар, Вера Вениаминовналöн кодь сöстöм ва босьтанiн Помöсдiн юкöнын сэсся абу, — ошкис аньöс Е.И.Склезнёв уджъёртыс. — Шензьöны и сыктывкарсаяс, кодъяс быд куим тöлысь мысти волöны босьтны колонкаясысь да юкмöсъясысь ва, мед видзöдлыны, шогмö-ö юны. Шуöны, мый татшöм идöрлуна ва босьтанiныс сэсся республикаын абу. Вера Вениаминовна зэв зiль, вöчö ставсö ыджыд кывкутöмöн. Гожöмын отсалö миянлы дзоньтасьны ломтысянiнын, пелькöдны, мавтны пытшкöссö. Сiйö сяммö ышöдны та вылö мукöдöс.
Вера Вениаминовна ёртасьö спорткöд. Аньяскöд ветлöдлö спортзалö, песöны ки-кок тренажёръяса жырйын, ворсöны волейболысь да пионерболысь. Ордйысьöны ас костаныс, петалöны и орчча сиктъясö. Регыд на ветлiсны Дiасёръяö да вермисны. А гортас семья. Тöждыс тырмö и радейтана верöсыслы, нылыслы да дзоляник внукъясыслы.
Галина НЕСТЕРОВА. Евгений Склезнёвлöн снимок вылын: В.В.Синотова.


Комментарии:

Добавить комментарий

Свежий выпуск: за 24 мая