Арся рыт. Слöтитö, усьö уль лым, тöлыс чизыр. Пуяс вылын коръяс абуöсь нин, ставсö нöбöдiс. Йизисны ва гöпъяс, но йиыс вöсни, сувтан да, зэв гораа трачмунö-жугалö. Лым эз на дзикöдз шебрöд мусö, кöнсюрö восьса. Татшöмнад лыжиöн он мун, и подöн сьöкыд, но Илья Коля мöдöдчис видзöдлыны лэч туй. Куим лун нин эз кайлы, гашкö, мыйкö шедiс. Тшыкас кö, коляс жальöн.
Рытсяньыс лöсьöдiс ноп: пуктiс нянь, сов, тшынöдöм порсь гос, дозйын чай да бöрвылас сюйис шкальчик доз. Ывлаыс кöдзыд да шонтысянторйыд колö быть.
Водз асывнас, пемыднас на, босьтiс Дружок понсö да вöрзьöдчис машинаöн. Вöрын вöляникысь восьлалiсны понйыскöд, видзöдалiсны лэчьяс. Кöнкö куш, кöнкö шедöма сьöла, а кöнкö и нуöма лэчсьыс пöткасö ош. Öтилаын шедöма чукчи.
Дыр кытшовтöм бöрын мудзисны, корсисны пöрöм пу бокысь косджыкин, пуксисны пажнайтны. Медводз Коля сетiс нянь понйыслы, сэсся босьтчис нуръясьны ачыс. Сёйис няньöн гос тор, шонтысьыштiс чайöн да пуксис куритчыны, шойччöдыштны кокъяссö.
Сы костi Дружок сёйис няньтö да кутiс ворсны лым шолльöн. Коля видзöдiс да аддзис, мый понйыс воддза лапаяснас вель дыр мыйкö тюрйöдлiс му вывтiыс, а сэсся кватитiс пиньяснас да шыбитiс вывлань. Лым вылö усьöм бöрын туплялiс нырнас мачöс моз. Ёна и гажöдiс кöзяинсö — эз ков цирк.
Сэк костi Колялы дум вылас усис шкальчикыс. Сюйис кисö нопъяс, а дозйыс абу. Гугöдлiс нопсö, но шонтысянторйыс эз вöв.
Матыстчис пон дорас да джöмдiс. Понйыс, вöлöмкö, ворсö оз лым шолльöн, а Колялöн шкальчикнас. Босьтiс Дружоклысь штоптö да эз пиняв, а сетiс чукчилысь коксö да шуис:
— Тайö тэныд циркачалöмсьыд козин.
Тадзи вöлi збыль. Коля пöръясьны эз куж.
Валентина НАСИРОВА.
Дiасёръя.