Помöсдiнса быд ордйысьöмын лоöны медводдзаясöн. Январын Сыктывкарын республикалöн тшупöда ордйысигöн Александр вермис нёльысь. Лоис медбурöн и февральын Рыбинск карын ордйысигöн. Ухтаын Сергей шедöдiс кык зарни медаль. Март 27-30 лунъясö Первоуральскын ордйысигöн, кöнi петкöдчис 500-ысь унджык спортсмен, Сергей лоис медводдзаöн кыкысь. Апрель 3-8 лунъясö Сыктывдiн районса Выльгортын вокъяс шедöдiсны куим медаль. Öткöн котöртöмысь Александрлы вичмис кык эзысь медаль, котырöн котöртöмысь вокъяс босьтiсны ыргöн медальяс.
Вокъясöс дасьтö тренер Илья Николаевич Игнатов, кодi ёна ошкö найöс ёна зiльöмысь. Вокъяс ставроссияса медбур лыжникъяслöн котырын.
Сергей велöдчö кöкъямысöд, а Александр öкмысöд классын. Зэв вежавидзысьöсь, авъяöсь, быть шедöдöны ас водзаныс пуктöм могъяс.
— Лыжи вылö видлiм сувтны ичöтсянь. Нёльöд классöдз ёртасим дзюдокöд. Витöд классянь босьтчим котравны лыжиöн. Миян зэв бур тренер Илья Николаевич, кодi миян вöсна висьö сьöлöмнас. Татшöм шедöдöмъясöдз ми воим сылöн отсöгöн. Миян бать-мамным водзтi сiдзжö котралiсны лыжиöн да öнi налы миян вермöмъясысь нимкодь. Ми пуктiм ас водзын мог лоны олимпийскöй чемпионъясöн да вöчам ставсö, мед пöртны олöмö. Котралам вежоннас квайтысь да пыр мунам окотапырысь. Ёна ветлöдлам чукöртчылöмъяс вылö. Бур, кор олöмын эм ышöдантор, — висьталiсны Сергей да Александр.
Чуймöдö, мый ордйысьöмъяс кежлö дасьтысигöн да ёна ветлöдлiгöн уна кад видзöмöн, вокъяс велöдчöны бура, сöмын «4» да «5» вылö.
Галина КЛЮЖЕВА.
Снимок Мария Игнатовалöн.