Война пансигöн Сьöдтыдiнысь Мария Васильевна Уляшевалы вöлi куим арöс. Сiйö воын и босьтiсны война вылö батьсö — Василий Ефимович Шаховöс. Медводдза воас и пуктiс юрсö вöрöгкöд тышын Эстонияын. Сэтчö жö усис батьыслöн Алексей Ефимович вокыс. Пётр Ефимович вокыс усис Сьöд саридз дорын.
Анна Ефимовна мамыс уджалiс колхозын, кер дорын. Тöдлiсны тшыгъялöм и кынмалöм. Уджалöмöн шедöдiсны кынöмпöт и челядь.
— 1947 воын лоисны нянь карточкаяс. Сы серти сетлiсны зэв вöсньыдик дзик уль шöрöм да эз шогмы весиг сёйны. Сюрлiс кö мыйкö чöсмасянтор, виччысьлi мамöс да юксьылi сыкöд, — казьтылiс олöма ань.
Челядь ёна вотчылiсны, но вöрысь петлöм бöрын кыйлiс уполномоченнöй, мырддьывлiс пестер, кисьтлiс став тшаксö да талявлiс.
Куим ас овмöс видзлiсны öти мöскöс. Вот вештыны колiс кöкъямыс килограмм вый да вичмылiс öти йöв стöканöн. Сёйлiсны шомакор, кача нянь, анькытш. Отсасисны видз вылын, кöнi вердлiсны яя шыдöн. Сетлiсны и рок.
1951 воын Мария Васильевна пырис колхозö. Сылы вöлi 13 арöс. 1959 восянь олö Кекурын. Танi и петiс верöс сайö, чужтiс кöкъямыс челядьöс. Öнi сылы 79 арöс.
Евгения Степановна Уляшева чужлiс Кекурын 1930 вося декабр 27 лунö. Кольлiс батьтöг да мамтöг да сiйöс быдтiс ыджыд мамыс. Кöкъямыс арöсöн мунiс школаö. Отсасис ыджыд мамыслы, печкис весиг шöрт. 13 арöсöн мунiс Ырым вомö кер дорö. Арсянь пöрöдiс вöр, тулыссянь керавлiс понöль. Сетлiсны 200 грамм нянь. Сёян вöлi зэв кизьöр. Ёна тшыгъялiсны. Вöр пöрöдысь айловъяслöн пывсьöм бöрын эз кольлы пöсь ва да пывсьылiсны гежöда.
1945 воын вöлi сэтшöм кöдзыд, мый муяс вылын нянь кынмис розъялiгас. Кынмис и картупель. Скöтöс видзны вöлi зэв сьöкыд. Война бöрын вийöдлiс сир. Весавлiсны Ырымын вадор, лöсьöдлiсны тöв кежлö вöр чукöртанiн. Тадзи Евгения Степановна уджалiс дас во. 20 во вöлi скöт дорын. Шойччытöг ставсö уджалiс 40 во. Бур уджысь сетлiсны уна пасъяс, кöкъямыс челядьöс чужтöмысь медальяс.
Евгения Степановна кувсис таво февраль 10 лунö. Сылы вöлi 87 арöс.
Роза УЛЯШЕВА.
Кекур.
Снимок вылын: М.В.Уляшева; Е.С.Уляшева.