Чолöм, ыджыд бать

[ A+ ] /[ A- ]

Менам ыджыд бать, Егор Васильевич Шебырев (Öнтип Васька Мишка Сергей Спира Петыр Вась Ёгор), чужлiс 1896 вося апрель 14 лунö Пожöгын ыджыд крестьянин семьяын. Великöй Отечественнöй война пансигöн сылы вöлi 45 арöс. Коркö дойдлiс коксö да чотiс, та вöсна гортсаяс чайтiсны, мый фронт вылö оз нуны. Вöлöм, война вылö шогмöны и татшöмъяс. 1942 вося февраль 2 лунö сiйöс нуисны Котласöдз. Сэнi буретш котыртчис 28-öд Невельскöй дивизия. Салдатъяслöн коймöд пайыс вöлi Комиысь, унаöн олöмаяс.
Ыджыд бать фронт вылысь семьялы мöдöдöм письмöясын век зiлис ышöдны, мед кутчысисны сьöкыд кадö. Пыр олiс мöвпöн, мый коркö воас войналы пом да аддзысяс накöд, и ставыс лоас бур. Но эз тай ло кöсйöм серти. 28-öд Невельскöй дивизия чорыда тышкасис Прибалтийскöй да Калининскöй фронтъяс вылын. Вир кисьтана косьясын пуктiс юрсö уна сюрс морт. Унаöс дзебисны Псков обласьтса муясö. Сэтчö жö, Пустошка карса öтувъя гуö, дзебисны Егор Васильевич ыджыд батьöс. Василий пиыс ветлiс копыртчывны батьыслы усьöм салдатъяслы сувтöдöм пас дорö. Ёна кöсйис ветлыны и менам мам, Анастасия Егоровна, но эз артмы. Ас водзö пуктi ыджыд мог — корсьны батьлысь гусö да ветлыны копыртчывны. Дыр мысти тöдмалi: сiйö куйлö Псков обласьтса Пустошинскöй районлöн Линец сиктын öтувъя гуын, мый йылысь висьталiсны районса администрацияын. Псков обласьтын олö нывлöн семья. Кольöм воын августын ме ветлi на ордö да кори Марк зятьöс нулыны ыджыд батьлöн гу вылö. Вöрзьöдчöмыс лоис сёрöнкодь, нёль час бöрын. Ёна полi, мый пемдас да нинöм ог аддзыв, ветлöмöй лоас весьшöрö. Нöшта лунтыр вöлi кымöра. Но мыйöн матыстчим Линец дорö, кыськö мыччысис шондi. Тайö вöлi сэтшöм виччысьтöмторйöн! Сьöлöм тырис ыджыд шудöн: тайö ыджыд бать сетiс юöр, мый нимкодясьö менам локтöмлы. Öтувъя гуын куйлö уна сё салдат — Рöдина дорйысьяс. Пöвъяс вылын нимъяс, нимъяс, нимъяс… На пиын — Шебырев Е.В, рядöвöй. Öзтiм сисьяс, пуктiм дзоридзьяс, улöдз копыртчылiм налы, кодъяс сетiсны олöм чужан му вöсна. Öтувъя гу вылö кисьтi Пожöгысь, чужанiнсьыс, вайöм му. Марк зять лыддис кулöмъясöс казьтылан молитва.
Öтувъя гусянь матiникын сулалö нöшта öти пöв, сэнi — 11 ов. Буракö, усьöм салдатъяслысь нимъяс вочасöн тöдмалöмаöсь корсьысьысь котыръяс. Сэнi эм кутшöмкö младшöй сержант И.М.Сенькинлöн ов. Колöкö, кодкö миян районса.
Меным ыджыда мойвиис: öнi тöда, кöнi куйлö ыджыд бать. Сылöн гу вылысь мутор вайи Коми муö. И ме вöча ставсö, мед менам челядь, внукъяс, правнукъяс да водзö чужысьяс эз вунöдны миян вужйысь петöм айловъясöс, кодъяс дорйисны фашистъясысь чужан му.
Галина НОВОЖИЛОВА.
Кулöмдiн. Снимок вылын: ыджыд бать.


Комментарии:

Добавить комментарий

Свежий выпуск: за 24 мая