Бать дорйис Сталинград

[ A+ ] /[ A- ]

Менам бать Пётр Николаевич Кочанов чужис Кулöмдiнын 1918 воын. Семьяын сiйö вöлi медся ыджыдöн да ковмис ёна отсасьны бать-мамлы. Та вöсна вермис помавны сöмын начальнöй школа, кöть и вöлi зэв сямаöн да вежöраöн. Кöть и вöлi том на, босьтiсны нормировщикöн, уджалiс и вöр примитанiнын.
Шöр Азияын армияын служитöм бöрын сiйö кольччис сэтчö овны да уджавны. Фронт вылö сiйöс мöдöдiс 1942 вося август помын Самаркандса горвоенкомат. Сентябрсянь ноябрöдз велöдiсны сетны доймöмъяслы отсöг. Декабр панасын налысь коймöд взводсö мöдöдiсны Сталинградса фронт вылö. Сiйö сэнi эз сöмын отсась доймöмъяслы, но и петавлiс тышö. «Конезавод» дорйигöн сiйö ёна доймалiс, юрыс пыркалiс. Веськалiс госпитальö, куйлiс зэв дыр, фронт вылö сэсся эз веськав, сылы сетiсны вермытöмлысь мöдöд группа. Сыктывкарöдз доймöм салдатöс колльöдiс санитарка. Батьлы сэки вöлi 25 арöс.
Война бöрын бать гöтрасис мелi да шань Анастасия вылö. Менам мам Анастасия Фёдоровна Кочанова нэмсö уджалiс связьлöн райузелын. Бать-мамлöн ми витöнöсь.
Бать абу нин миянкöд 24 во. Кор вöлi ловъя, эз радейт висьтавлыны война йылысь, эз радейт пасьтавны ордена-медаля пиджаксö, кышавлiс сöмын Победа да Сталинград мездан лунъясö. Медся радейтанаöн сылöн вöлiны «На безымянной высоте» да «О солдате Сталинграда» сьыланкывъяс. Ме аддзылi, кыдзи сiйö бöрдiс.
Война бöрын бать ёна окотитiс ветлыны Волгоградö, но эз артмы. Некымынысь сы дорö волiс Азовысь öтлаын служитысь. Ёртъяс дыр сёрнитiсны, казьтылiсны войналысь вояс, усьöмъясöс.
Ёна важöн нин ме мöвпалi ветлыны кар-герой Волгоград-Сталинградö да копыртчывны сылы. Окота вöлi видзöдлыны тыш мунанiнъяс, кöнi вöлi миян бать да пöль. Лöсьöдчим сылы 75 во тыригкежлö. Мунi Марина нывкöд, нуим Коми мусянь да Кулöмдiн районсянь чолöм, öд вир кисьтана тышъясын вöлi налöн уна пи.
Волгоград карлань матыстчигöн öшиньысь ми аддзим ыджыд шемöсмöдантор — тайö вöлi Рöдина-мамлöн статуя. Тайö Победалöн пас, и карын сiйöс позьö аддзыны быдласянь. Сiйö сулалö Волгоградлöн медся вывтасiнын — Мамаев курган вылын. Мечнас судтаыс 85 метра, мечыслöн сьöктаыс 14 тонна, дзоньнас 8 сюрс тонна сьöкта, сiйö кöртысь да бетонысь. Сiйö мирын медся ыджыд пасъяс лыдын да лоö Россиялöн сизим шемöсмöданторйысь öтиöн.
Карас зэв аслыспöлöса сулалöны керкаяс, казьтылан пасъяс, уличаяс, йöзлöн чукöртчанiнъяс, вадор уличаяс, планетарий, юдорса вокзал, бура лöсялöны öнiяыс и важыс, содтöны мичлун. Паськыд лöз вöнь кодь Волга-мам, кодi сьöкыд тышъяс дырйи сотчис мусирысь да карасинысь, пасьмунлiс вöрöглöн бомбаясысь, вöлi салдатъяслöн вирысь гöрд.
Кар шöрын «Сталинградса тыш» зэв ыджыд музей-заповедник. Восьса енэж улын уналаын миян военнöй техника — пушкаяс, танкъяс, самолётъяс, поездъяс. Эм и немечьяслöн военнöй техника.
Казьтыланаöн колис «Геройяслöн аллея», кодöс мичмöдöмаöсь быдногыс да эмöсь усьöм воинъяслы казьтылан пасъяс, куслытöм би, фонтанъяс, эм и ловъя тополь, кодi тöдлiс Сталинградса став тышъяс, бомбаяслысь пасьмунöмсö, аддзылiс салдатъяслысь став дойсö, но пыр на ворсöдчö коръяснас, быттьö висьталö, мый олöм кулöмысь вынаджык.
Кар шöрын жö важ изанiн. Олан керкалöн öти бокас кык тöлысь чöж кутчысисны миян салдатъяс. Кор усисны командиръяс, веськöдлыны босьтчис сержант Яков Павлов. Та бöрын тайö керкасö кутiсны шуны Павловлöн керкаöн. Война бöрын медводз ловзьöдiсны буретш сiйöс. Яков Павловлы вöзйисны тайö керкасьыс кöть кутшöм патера, но сiйö эз кöсйысь: «Кыдзи ме верма овны танi, кор быдлаысь аддзылi ассьым виöм ёртъясöс? Некыдз ог вермы».
Карыс шемöсмöдö аслас мичаторъясöн. Кöсйим сэнi овны куим лун, а олiм квайтöс. Казьтыланаöн колис и архивö ветлöм. Вочаалiс миянöс да вочавидзис юалöмъяс вылö шöр специалист Н.Ю.Новикова. Ми вайим козин пыдди батьлысь снимокъяс, Сöветскöй Союзса Герой Георгий Тимушев йылысь книга, миян район да республика йылысь книгаяс да буклетъяс, республикалысь да районлысь гербъяс — ставсö 37 тор.
Сiдзжö вöлiм Мамаев курган вылын. Тышкасисны 200 лун, статуя дорö кайö 200 тшупöд. Победалы 75 во тыригкежлö карсаяс пуктiсны 45 гöрд тупу, выльмöдiсны став казьтылан пассö да скульптураяс.
Медся бöръя лунас ми ветлiм теплоходöн Волга кузя, нимкодясим мича карöн. Миянлы Маринакöд зэв долыд, мый вермим ветлыны Волгоградö, кöнi вöлi тышъясын миян бать да пöль.
Валентина ГИЧЕВА.
Гижысьлöн снимокъяс вылын: батьöс казьтыланторъяс; «Рöдина-мам чуксалö» статуя дорын.

Комментарии:

Добавить комментарий

Свежий выпуск: 28 марта

Осторожно — мошенники!