Пожöг сиктса культура керкаö чук ртчылісны районысь енбиа челядь. Сьылісны, йöктісны, лыддисны кывбуръяс, шмонитісны, петкöдлісны шензьöданторъяс.

Кыпыд гаж восьтіс Скöрöдумса зонка Ян Дёмин, лыддис Коми мулы сиöм кывбур. Сiйö бура петкöдчис районса енбиа челядьлöн ордйысьöмын, лоис мöдöн. Тулыслы сиöмтор петкöдлiс Пожöгса «Журавушка» котыр. Сьылiсны Пожöгысь «Непоседы» котырысь ичöтик нывъяс, Пожöгдінса «Зарань» котыр. Сьöлöм вöрзьöдiс Пожöгдінысь Ольга Васильевна Курочкиналöн йöзöс аттьöалöм. Сылысь семьясö суис ыджыд шог. Машинаöн мунігöн ёна доймаліс ыджыд мамöн шуысьыс. Куим арöса нывкалöн семьяыс шыöдчис сиктса войтыр дорö отсöгла, и, дерт жö, некод эз кольччы бокö.
Гижны кö гажлöн нуöданног серти, йöктiс Кебанъёльысь «Элегия» котыр. Скöрöдумысь Яна Дёмина сьыліс Светлана Лободалысь Ксения Кармановаöн комиöдöм «А синъясыд…» сьыланкыв. Сьылiс сiдзжö Пожöгдінысь Алина Сенькина. Петкöдчисны Помöсдінысь «Вдохновение» да Кебанъёльысь «Прекрасное настроение» котыръяс. Дзик выльöн лоис Скöрöдумысь ичöтик нывкаяслöн циркын моз петкöдчöм. Вомынбöжысь Екатерина Сенькина сьыліс В.Г.Лодыгинлöн «Менам дона Россия» кывбур вылö лöсьöдöм сьыланкыв, нöшта Ирина Чувьюроваöн лöсьöдöм частушкаяс, ачыс ворсiс гудöкöн. Йöктіс Пожöгдінысь Магдалина Третьякова. Кывбуръяс лыддисны Анжелика Бугримова да Нина Третьякова. Йöктiсны Скöрöдумысь «Данс-Авеню» да Пожöгысь «Задоринка» котыръяс. Сьылiсны Ручысь «Сударушки» да Кебанъёлысь «Сöстöм ёль» котыръяс. Йöктiс вальс Скöрöдумса «Рябинушка» котыр. Серам петкöдлiсны Пожöгса шмонитысьяс Владислав Шахов, Иван да Юрий Третьяковъяс. Сьылiсны Кекурысь ыджыд мама-ныла Кристина да Зинаида Уляшеваяс.
Гаж петкöдлысьяслы вичмисны аттьöалан гижöдъяс да юмовторъяс. Сьöма отсöг, кыдзи и пыр, вичмöдіс Кекурысь Агния Михайловна Шахова. Отсаліс вердны да юктавны, мыськис тасьті-пань Алла Павловна Кучева.
Колис содтыны, мый гажсö нуöдiс библиотекаöн веськöдлысь Полина Борисовна Сенькина. Выльысь аддзысьлытöдз!
Анжела ИЛЬИНА.
Евдокия КилатлÖн снимокъяс вылын: «Непоседы» котырысь ичöт нывъяс; йöктöны Скöрöдумысь «Рябинушка» котырсаяс.