Кольöм воын видз-му овмöслöн министерство конкурсö пырöдчöмысь дипломöн пасйис Керчомъяысь ас овмöс кутысь Алексей Павлинович Катаевöс. Евгения Анатольевна гöтырыскöд видзö кык мöскöс, öти куканьöс, öти öшкöс да чипанъясöс. Сылöн нёль трактор да видз-му овмöсса быдсяма техника. Картупель босьтöны 10-ысь унджык тонна. «Мöд няньöн» могмöдöны асьнысö, вузалöны районсаяслы, нуöны карö. Заптöны и уна турун, лишаланасö вузалöны.
Алексей Павлинович трактористö велöдчылiс школаын да аттестаткöд тшöтш сетiсны и право. Армияöдз трактористалiс совхозын да сэтчö жö локтiс служитöм бöрын. Том мортöс совхоз ыстылiс велöдчыны видз-му овмöсса техникумö. Лоис техникöн, механикöн да удж котыртысьöн. Кольöм нэмся 90-öд воясын олöм гудыртчис да сiйö мунiс карö, куим во уджалiс пытшкöсса делöяс кузя министерстволöн кусöдчанiнын. Вöзйисны чужанiнын уджавны участокса уполномоченнöйöн да локтiс бöр Керчомъяö, кöнi виччысис сьöлöмсö косьтысь Евгения. 1994-öд воын öтлаасисны. Том гöтырöс вайис чужан керкаас, кöнi олiс мамыскöд. Налöн мöс дорö содiс тыра ялавич, кодöс козьналiс Евгениялöн мамыс.
Кыкнанныс олiсны ыджыд семьяясын, кодъяс видзисны скöт, да уджалiсны челядьдырсянь. Öтув олiгöн Евгения лысьтысис да идрасис, вöчис став коланасö.
Чужис Илья, во мысти Александра. Алексей Павлинович тöждысис лöнь олöм вöсна, лоöмторъяс вылö петалiс лун кöть вой, туясис-юасис районса юкöнысь уджалысьяс вотöдз, а сэсся накöд.
— Сэки Керчомъяö туй вöлi Льöмтыкерöс пыр. Колiс вуджны Эжва вомöн паромöн. Сьöкыд мыжъяс туялiгöн, тулыс-арын, кор кылалiс либö сувтiс йи да эз вуджöдчыны, юкöнысь воысьяс пыр олiсны миянын. Гöтырлы вöлi сьöкыд, но эз элясьлы, эз пинясьлы, — казьтылiс Алексей Павлинович, кодi 17-ысь унджык во вöлi уполномоченнöйöн да пасйылiсны милициялöн почёт пöв вылö.
— Öтлаасьöм бöрын регыд верöс ньöбис öти мортлысь трактор. Ёна отсасис Анатолий Иванович батьöй, кодi ловзьöдлiс тайö тракторсö узигöн на. Сыысь эз кольччывлы вокöй. Техникаöн ваялiм турун, картупель и пес. Водзтi уна картупель эг вöдитлöй, а сэсся верöсöй öддзис, вочасöн босьтiс эновтöм муяс да видзьяс, ньöбалiс тракторъяс, гöран-кöдзан техника. Öнi бергöдчам кокниа. Гидö петам öтлаын. Ме öшиньöд шыблала куйöд, лысьтыся, а верöс вердчö, пыртлö гидö турун, чукöртö куйöд, — содтiс Евгения Анатольевна.
Сьöкыдысь эз повны и ныла-пиа, уджалiсны верстьöкöд радын. Быдмыштiсны да лысьтысисны-идрасисны. На вылö усис овмöс, кор мамыс чужтiс коймöд кагаöс, Дарья чойöс. Кыкнанныс нин лэбыштiсны шуда позйысь да лöсьöдiсны ассьыныс семьяяс. Илья юркарса Эжваын, Александра Кулöмдiнын. Дарья велöдчö мöдöд классын.
Муяс керка гöгöрынöсь, сиктлöн Керöсынöсь. Визьяс вöчöмöн кипомысь пуктöны 350 ведра картупель. Арнас путкыльтöны техникаöн, но чукöртöны кипомысь жö. Кисьтöны гаражö, тöлöдöм бöрын сюйöны куим гуö. Кольöм воын вузалiсны вит ведраа 130 мешöк картупель. Крестьянин овмöс кутысь П.М.Поповкöд вежисны вына кöрым вылö. Посниöн вердöны скöтöс. Водзтi яй да картупель инавлiсны садйö, öти воö весиг ньöблiсны тшöгöдны куканьясöс «Пожöг» кооперативлысь, но таысь эновтчисны. Öнi аслыныс кольöдöны öти куканьöс, мöдсö вузалöны.
Öти мöс суткиöн шöркодя лысьтö 15 литра. Иналöны Кулöмдiнса МТС-лы, сиктсаяслы. Евгения Анатольевна аслыныс вöчö рысь, нöк, сыр.
Гöр, ытшкан, куртан, юр чукöртан агрегатъяс дiнö воддза воын Алексей Павлинович ньöбис куртан, а таво турун топöдан, кодi вöчалö 10-15 килограмм сьöкта тюкъяс.
Тшöкыда волöны гортö да отсалöны бать-мамлы Илья да Александра. Мамыс бöрся мырдöн петö гидö куканьяс дорö Даша.
Алексей Павлинович öнi Керчомъяын кусöдчысьяслöн торъя постса командир. Евгения Анатольевна, кодi уджавлiс садйын, пусьылiс, пелькöдчылiс, велöдiс челядьöс, вузасьлiс лавкаын, бухгалтералö велöдан управлениесянь.
— Томдырйи гöтыркöд ветлывлiм вöр керкаö. Челядьнымöс кольлiм мамлы. Öнi тулыс-арын 10 лун кежлö вöрö лэдзлö жö. Сэнi и шойчча, чужанiнысь бокö ог ветлöй, — висьталiс А.П.Катаев.
— Велалiм бергöдчыны ыджыд овмöсöн да быттьö сiдзи и колö. Тöвнас, кор мöсъяс сулалöны, шойччам. Верöс шулывлö, гашкö пö, паськöдчыштам на. А мый? Позьö, — шуис ань.
Марина ДАДАШОВА.
Гижысьлöн снимок вылын: А.П.Катаев.