Март 30 лунö гажа вöлi Кулöмдiнса медводдза сад дорын, кöнi котыртлiсны челядьлысь тöвся ордйысьöм. Налы колiс шыблавны гын сапöг, кыскасьны му вывтi (тар кыйöдöм), котравны лыжиöн (йöра бöрся вöтчöм), новлöдлыны клюшкаöн шайба (руч кок туйöд мунöм), исласьны даддьöн.
Подулас босьтiсны «Вöрса вензьöм» мойд, кодöс висьталiс Ёма-баба:
— Олiсны-вылiсны менам вöрын йöра, руч, кöч да кöин. Чукöртчисны гажа эрд вылö да кутiсны вензьыны, кодi медся тэрыб да збой. Йöра ошйысис, мый медся öдйö котралö, кöч медся вылö чеччалö, кöин медся öдйö кыссьö морöс вылас, руч медся бура лыйлö гын сапöг. А тiян пиысь кодi медся тэрыбыс, винёлыс да збойыс?
Челядь ордйысисны эз сöмын Кулöмдiнын, но и Югыдъягын да Помöсдiнын, ставыс чукöрмылiс 10 котыр.
Медся веськалысьöн лоис Помöсдiнса мöдöд садйысь «Öтувъя» котыр. Медся öдйö нуис клюшкаöн шайба да кыссис Кулöмдiнса медводдза садйысь «Вильышпоз». Даддьöн медся öдйö лэбалiс Кулöмдiнса мöдöд садйысь «Винёв» котыр. Лыжи вылын медöдйö котöртiс Помöсдiнысь «Шондi» садйысь «Ошъяс» котыр.
Петкöдлiсны медбур кад да вермисны Кулöмдiнса медводдза садйысь челядь. Мöдöн лоис Кебанъёльса «Мойд» садйысь «Багатыръяслöн челядь», коймöдöн — Помöсдiнса «Шондi» садйысь «Ошъяс».
Грамотаяс да козинъяс вичмисны Помöсдiнса мöдöд садйысь «Öтувъя», Кулöмдiнса «Нюм» садйысь «Тэрыб кок», Носимса да Паспомса садйысь «Лым чиръяс», Немдiнса «Тэрыб йöраяс», Кулöмдiнса сизимöд садйысь «Гулю», мöдöд садйысь «Винёв», Югыдъягса мöдöд садйысь «Визув дзоридзьяс» котыръяслы.
Галина КЛЮЖЕВА.
Гижысьлöн снимок вылын:
«Вильышпоз» котыр.