Дурмöдчöны и районсаяс

[ A+ ] /[ A- ]

Май 4 лунö чукöртчылöс юöмлы да наркотикъясöн дурмöдчöмлы паныд сулалысь комиссия. Пасйисны, мый тайö туйвизь серти кывкутöмöн уджалö пытшкöсса делöяс министерстволöн районса юкöн. 2017 воын, кыдзи и воддзаясын, пöртöсны олöмö «Мак-2017», «Юöрт, кöнö вузалöны сьмерт», «Притон», «Пангея» туйвизьяс серти урчитöмторъяс.
«Мак — 2017» туйвизь олöмöм пöртöмöн 18 йöрысь казялöсны мак. Сöйöс быдтысьяскöд сёрнитöм бöрын йöз асьныс нетшкисны вужнас да шыблалöсны дзоридзсö. Административнöй делö некод вылö эз панны. Быдöн висьталöс, мый максö эз кöдзлы, быдмö ачыс некутшöм дöзьöртöг. Полицияын уджалысьяс кытшовтöсны 1306 йöр, видзöдлöсны 1127 машина. Кольöм вося августын найö казялöсны кык айловöс, кодъяс вöлöны кольмöм кодьöсь. Налысь аддзисны 0,66 грамм наркотик, мый лоö унаöн. Öтиыс 1993 воын чужлöм морт, водзтö эз мыждывны, психиатр-нарколог дорын абу пасйöма, некöн оз уджав, гöтыра, эм дзоля кага. Сöйöс йöршитлöсны дзескыдöнö вит сутки кежлö, мöдöдöсны бурдöдчыны мырдöн, пасйисны нарколог дорын. Мöд айлов 1987 воын чужлöм, водзтö эз мыждывны, некöн оз уджав, психиатр-нарколог дорын абу пасйöма. Сöйöс сöдзжö пуксьöдлöсны вит сутки кежлö да индöсны бурдöдчыны мырдöн, пасйисны нарколог дöнын.
2017 вося март 13-24 лунъясö мунöс «Юöрт, кöнö вузалöны сьмерт» паса удж. Полицияса уджалысьяс волöсны районса школаясö, сёрнитöсны велöдчысьяскöд, öлöдöсны лёк туйвизьö сетчöмысь. Сöдзжö видзöдалöсны йöзаинъяс, кытчö чукöртчылö уна том йöз: Кулöмдöнса да Кебанъёльса, Зимстанса, Вочса, Дзольса, Помöсдöнса, Югыдъягса да Тимшерса культура керкаяс да клубъяс, «Олимпик» спорт шöрин, «Согдиана» да «Жемчужина» кафеяс.
Полицейскöйяс видзöдлöсны и транспорт. Казялöсны кöкъямыс административнöй право торкöм да на кузя лöсьöдöсны гижöдъяс. Наркотик нуысь да наркотикöн дурмöдчысь водительясöс эз казявны.
«Притон» паса удж нуöдöгöн полиция волöс на дорö, кодъясöс пасйöма районса нарколог дорын да кодъяслöн бурдöдчöм йылысь юöр волöс Сыктывкарса наркодиспансерысь. Закон торкöм эз казявны.
«Пангея» паса удж нуöдöгöн полицияса уджалысьяс видзöдлöсны аптекаяс, кыдзи видзöны да вузасьöны бурдöдчанторъясöн, эм-ö контрафакт да с.в. Торкалöмъяс абуöсь.
Районса бурдöдчанöнысь психиатр-наркологлöн юöр серти, «наркомания» висьöмöн пасйöма 24-сянь 45 арöсöдз вит айловöс, куимыс Кулöмдöнысь. 2017 воын пасйисны куимöс. Наркотикöн пагöдчöм бöрын Сыктывкарын пальöдöсны куим мортöс (асьныс пасйысьöмаöсь Кулöмдöн районын) да öтиöс Кулöмдöнса бурдöдчанöнын. Талун районса нарколог дорын судлöн шуöм бöрын бурдöдчöны кыкöн. Психиатр-нарколог медся тöдчанаöн лыддьö тыр арлыдтöмъяскöд удж: сёрнитö, кутшöм лёкторйöдз вайöдö наркотикöн дурмöдчöм, зöльö казявны найöс, кодъяс öдйöджык вермасны кежны тайö лёк туй вылас. Сöдзжö велöдö сикт-посёлокса бурдöдчанöнъясын уджалысьясöс, кыдзи казявны наркотикысь кольмöм томуловöс.
Лыдпасъяс абу ыджыдöсь, но найö тшöктöны чорыда мöвпыштчыны, öд наркотикъяс орччöнöсь. Наöн пагöдчöны миян районсаяс, и тайö омöльторйыс зэв öдйö вермас паськавны миян челядь, тöдсаяс пöвстын. Медыджыд тöждыс, дерт, быдмысь нывкаяс да зонкаяс вöсна. Веськодьöн лоны некодлы оз позь — ни бать-мамлы, ни велöдысьяслы, ни став верстьöлы.
Лидия ЛИПИНА.


Комментарии:

Добавить комментарий

Свежий выпуск: за 24 мая