Западнöйлöн гусятор

[ A+ ] /[ A- ]

Коми республика талун — этша йöза ыджыд му, кöнi олысьяслöн лыд воысь-воö чинö, абу ёна сöвмöма промышленносьт. Чайтсьö, мый тайö эндöм му, кöнi нинöм тöдчанаыс абу. А öд регыд на ыджыд öдöн кыпалiсны каръяс, туялiсны да сöвмöдiсны выль муяс, пуктiсны аскиа промышленносьтлы зумыд подув, дасьтiсны наука серти дыр кадся балаяс. Öти олöмö пöртантор йылысь и висьтала тайö гижöдын, но пыр жö шуа, мый сыысь нинöм бурыс эз пет.
Коми республикаын нюжöдчöма Тиманса нöрыслöн медыджыд юкöн — мупытшса озырлунъяса вывтасiн. Тöдса, мый комияс видлiсны туявны сiйöс 15-öд нэмын на да эз вунöдлыны и водзö. Босьтчылiсны та бердö странаын промышленносьт сöвмöдöмкöд йитöдын, кор ковмисны мупытшса озырлунъяс.
Талун Тиманса нöрыс йылысь сёрнитiгöн медводз юрö воö сiйö, мый сэнi уна нефть да газ. Но бура тöдса, мый сiйö озыр абу сöмын углеводородъясöн, сэнi эмöсь и алмазъяс, титан, агатъяс, гипс, фосфоритъяс да с.в. Тиманын эм и боксит, кодысь вöчöны алюминий. Дерт жö, сiйö эз коль бокö сöвет власьтлöн видзöдлас улысь, кольöм нэм шöрын мöдöдiс туясьны учёнöйясöс.
Кулöмдiн районын боксит медуна Тимшерса, Пузласа, Черса да Зеленечса куйлöдъясын. Медся бур Тимшерса да Пузласа боксит.
Буретш танi, Ухтасянь 130 километра ылнаын, Тиманса нöрыслöн медся лунвылын, Кулöмдiн районын 1960 воясын чужис посёлок. Сiйö лоис районлöн рытыввылын да сы вöсна и шуисны Западнöйöн. Дыр-ö сiйö сулалiс, лючки абу тöдса — душ-мöдсянь дас воöдз. Посёлокын öнiöдз эмöсь бетонысь шахта, сэтчö лэччысь шлангъяслöн колясъяс.
Бокситъяс вермöны куйлыны метра джынсянь 350 метра пыднаöдз, та вöсна лэптыны сёйсö писькöдчылiсны зэв пыдöдз. Мед эз во ва, мусö кынтiсны. Лэптiсны уна сёысь да пукталiсны ящикъясö, кодъясöс видзисны складын.
Посёлок вöлi зэв ыджыд, 200-400 морт вылö, ставсö котыртöма зэв бура, весиг он öткодяв талунъякöд. Шоныд да ва воисны му увтi нюжöдöм уна сё метра кузьта трубаясöд, уджалiс мазут вылын ломтысянiн, ломтас, кыдзи и сёян да мукöд колантор, ваялiсны вертолётöн Ухтаысь. Бетон плитаясысь вöчöм сылы пуксьыланiн век на эм. Вöлi туй, дерт, абу асфальта, но бур вöрса туй. Вöлi, дерт, и пывсян, сытöг некыдз. Олан да уджалан некымын дас керка, вердчанiн, юкмöсъяс, ыджыд цистернаяс, машинаяслы гараж. Кыв шутöг, вöлi сад (кольöмаöсь пукаланiн, лыаа ворсанiн, ва видзанiн). Ставыс тайö висьталö, мый овмöдчылöмаöсь збыльысь дыр кежлö. Но воис кад да туясьöмысь дугдiсны. Уджсö дугöдiсны немвиччысьтöг. Йöзсö öтитöг нуисны öти-кык лунöн, а тасьтi-пань, паськöм, пызан-улöс колисны. Найöс тшыкöдiсны, медым эз шогмы вöдитчыны. Дозмуклысь розьöдлiсны пыдöссö, жуглiсны пу кöлуй, косявлiсны паськöм. Но эз нуны перйöм му тыра (керна) ящикъяс, найö куйлöны сэнi, кытчö тэчлiсны 50 во сайын.
Сёрнитöны, мый посёлокын öти кадö öтпырйö немвиччысьтöг кулiс сизим ли кöкъямыс морт. Öнiöдз абу тöдса, мый вöсна. Öтияс шуöны, мый уджалiгкостiныс му пытшкысь петiс радон газ. Сiйö вермö лоны боксита да углистöй сланеца му пöрöдаясын, кöнi эм уран (радий), да кодъяс вермöны куйлыны 50 метра пыднаын. Ураныс сэнi вермас лоны 0,002 процентысь унджык. Та вöсна йöз веськалiсны радиация улö. Тайö висьталöмсö абу подулалöма, öд дзик некöн абу пасйöма, мый сэнi кöнкö эмöсь ли вермасны лоны радиактивнöй куйлöдъяс. Сiдзжö шуöны, мый йöз пагалiсны спирт сораса кутшöмкö юанторйысь (антифриз, тормознöй жидкосьт), кодöс сорсьöмöн юисны пöкмелля вылысь дыр гажъялöм бöрын. Татшöмыс вермис лоны, кутны кö тöдвылын войвывсаяслысь оласног да этш. Но та вöсна посёлоксö öдвакö тупкисны.
Гöгöрвоанаджык таланьысь мусö пасьвартöм вöсна мунöм. 1960-1970 воясын Западнöйсянь матын дасьтылiсны да нуöдлiсны ядернöй взрывъяс, медым Москваса «Гидропроект» институтлöн бала серти бергöдны лунвылö войвывса юяс да содтыны ва Каспийö. Кöть эськö кодсюрö шуö, мый юяс бергöдöм — сöмын ылöдчöм. Збыльвылас кöсйисны тöдмавны, кыдзи ядернöй взрывъяс тöдчöны вöр-ва да йöз вылö. Колö шуны, мый тайö мöвпыс абу сöрана. Западнöй посёлоклöн тупкысьöм бöрын 1971 вося мартын Перым обласьтлöн Чердынса районын, Коми АССР-кöд орччöн, гуся «Тайга» бала серти грымöбтiс куим пöвста ядернöй взрыв. Куим зарядлöн выныс вöлi 45 килотоннаа (Нагасаки карöс пасьвартiс 21 килотоннаа взрыв).
Видзöдлыны кö ставсö öтув босьтöмöн: зарядъяс улö лöсьöдöм юкмöсъяс (найö ёна паськыдджыкöсь сёй перъян юкмöсъяс дорысь), спектометриялöн лыдпасъяс (радийлöн да калийлöн торъялiгöн артмöм энергияа искусственнöй изотопъяс), а сiдзжö странаса правительствоöн юöръяс дзебны зiльöм, мед эз шызьыны йöз — ставыс тайö вайöдö мöвпöдз, мый Западнöйын видлiсны ядернöй öружие.
Вермас лоны, мый этша йöзаинын туялiсны мусö да вöр-васö взрывъяс нуöдтöдз да мыйкö лоис эз сiдзи, кыдзи урчитiсны. Тайö кö збыль, то посёлоксö вермисны сиптыны сы вöсна, мед эз разав ядернöй программа дасьтöм йылысь юöр. Вермас лоны и нöшта кутшöмкö помка, кодi öнiöдз абу тöдса.
Эновтöм посёлок, кодöс кыпöдöмö да лöсьöдöмö, чайтсьö, сюйисны эз этша сьöм, лоис некодлы ковтöмöн да кутiс киссьыны. Западнöй посёлок вочасöн нитшсялö, быдмöны пуяс, керка стенъяс бокö кодзувкотъяс вöчисны джуджыд каръяс, керкаяс сiсьмöны да вöйöны муö — вöр бöр босьтö ассьыс. Но и талун, лоöмторсянь матö нэм джын мысти, позьö кывны кольöм кадлысь ловшысö. Став кыпöдлöмыс да дзикöдз вальдöмыс нин весьöпöртö и шогöдö. Коркö, гашкö, учёнöйяс да Западнöйын уджавлысьяс висьталасны посёлоклöн гусятор йылысь. А талун 50 во сайся лоöмтор сiдзи и кольö миянлы нöдкывйöн.
Александр ШАРОНОВ.
Кöрткерöс.
Интернетысь босьтöм снимокъяс вылын:
танi коркö вöлi Западнöй. 


Комментарии:

Добавить комментарий

Свежий выпуск: за 16 августа