«Парма гор» газетлöн редакцияö воис Дереваннöй сиктса олысь Н.С.Абдуразаковалöн президент В.В.Путин дорö шыöдчöм. «Дереваннöй» овмöдчöминса олысьясöс майшöдлö, мый шöр школа кöсйöны вöчны 9 класса школаöн. Вайöдам Наталья Сергеевналысь гижöдсö.

«Россия Федерацияса президент
Владимир Владимирович Путинлы

Шыöдчöм
Пыдди пуктана Владимир Владимирович. Шыöдча Тiян дорö, кыдзи бать-мамлöн комитетö пырысь да Дереваннöйса шöр школаын 8-öд класса велöдчысь Виктория Абдуразаковалöн мам.
Миян школаын шöр тöдöмлунъяс босьтö 82 велöдчысь. Школаын уджалöны зэв зiль велöдысьяс, кодъяс пуктöны став вын, медым челядь эз мунны 9-öд класс бöрын, а помалiсны чужан сиктса шöр школа.
Ми, Дереваннöйса шöр школаын велöдчысьяслöн бать-мам, ог кöсйöй, мед сiйö лоис 9 классаöн да челядьнымöс кутiсны новлöдлыны 15 километра ылнаса Ручса школаö.
Сиктъясын колö восьтавны выль уджаланiнъяс, медым йöз инасисны, татöг найö кутасны мунны бокö, а сикт-грездъяс вочасöн кусасны. Россияын восьтöны 10 велöдчысь вылö выль школаяс, и тайö бур, а миян 82 велöдчыся школаысь сипталöны классъяс, кöть бура велöдöм могысь эм став позянлун. Миян школаын кызвын велöдысьыслöн вылi тшупöда категория. Мария Андреевна Нестерова — Россияса пыдди пуктана велöдысь. Велöдысьяс пырöдчöны унасикас конкурсъясö, тшöтш и республика тшупöдаö, да лоöны медбуръяс лыдын. Найö ышöдöны петкöдчыны конкурсъясын да мукöдторъясын челядьнымöс, кодъяс 13-ысь ветлiсны Москваö, 5-ысь вöлiны вермысьяс лыдын. Унаöн школа бöрын пырöны вылi тшупöда велöдчанiнъясö. Вöвлöм уна велöдчысь лоисны нималана йöзöн — гижысьясöн, музыкантъясöн, серпасасьысьясöн, журналистъясöн.
Талун миянлысь челядьöс кöсйöны помöдны шöр школа Ручын. Но Руч да Дереваннöй костын туйыс шогмытöм. Ручын школа коми да миян роч челядьлы сэнi лоас сьöкыд. Ручын 71 велöдчысь, миян 82, и сэтысь уна бать-мам ныв-пинысö вуджöдöны миян школаö. Ручын оз нуöдны öтувъя госэкзамен кежлö консультацияяс, абуöсь кружокъяс да секцияяс, а миян школаын эмöсь. Миян уна йöз семьяысь быдтан челядь, и воысь воö налöн лыдыс содö, а Ручын татшöм челядьыс этша. Дереваннöйса школаын велöдöны англия, а Ручын франция кыв. Сыысь, мый миян школа лоас 9 классаöн, биысь дорйысьяслöн корöмъяс оз чинны ни бырны, найöс быть ковмас пöртны олöмö. Йöз школаö мунöм бöрын ныв-зонлы ковмас во джын велавны выльторъяс дорö.
Владимир Владимирович, кора Тiянöс ас нимсянь, Дереваннöйса шöр школаын велöдчысьяслöн бать-мам, сиктса олысьяс нимсянь отсавны, мед ставыс лоис бур ногöн.
Наталья Абдуразакова.
Дереваннöй.

Тайö гижöд кузя ме шыöдчылi районысь велöдан управлениеса начальник Оксана Васильевна Лебедева дорö.
— Некутшöм сёрни, мый Дереваннöйса шöр школа лоас 9 класса школаöн, оз на мун. Оз ков водзвыв шызьöдны да ыззьöдны йöзöс. Татшöм коланлуныс кö лоас, ме медводз ачым вола да сёрнита овмöдчöминсаяскöд, школаын уджалысьяскöд да та кузя ассьым мöвпъясöс висьтала комиссиялы да сiйö нин вöчас кывкöртöд. А Ручса школа йылысь гижöмтор збыльыслы оз лöсяв ньöти. Танi зэв кывкутöмöн матыстчöны экзаменъяс сдайтöдiгкежлö, ёна тöждысьöны челядь вöсна. Ручса школа помалысьяс век петкöдлöны экзаменъяс вылын зумыд тöдöмлунъяс. Танi зэв бура уджалöны енбиа челядькöд, ыджыд тöдчанлун сетöны спортлы. Öнi на сылысь уджсö гöгöрбок донъялiс велöдан министерство да водзö нюжöдiс школалысь велöдöм вылö аккредитация, — висьталiс Оксана Васильевна.
Н.С.Абдуразаковалысь президент дорö шыöдчöмсö лыддигöн менсьым сьöлöмöс кырыштiс со мый: миян Дереваннöйса челядь пö рочöсь да налы сьöкыд лоас велöдчыны Ручса коми школаын. Окота тöдны, корсянь нин дереваннöйсаяс сэтшöма рочмисны, мый пöгибö воисны коми школаын велöдчöмысь? Мöд-кö, кыдз ме тöда, Ручса школаын и математика, и химия, и физика, и мукöдтор — ставсö велöдöны рочöн. Сьöкыд вермас лоны сöмын коми кывйысь да литератураысь, öд сэнi сiйöс велöдöны кыдзи чужан кыв (мыйысь налы ыджыд аттьö!), а оз кыдзи государственнöйöс. Но и танi петан туйыс эм: велöдны водзö кыдзи государственнöйöс.
Ме, кыв шутöг, сы дор, медым сиктъясын эз тупкысьны ни чинны школаяс да бурдöдчанiнъяс, сы вöсна мый бырöны кö найö, öдйö кусöны и сиктъяс. Гашкö, таысь мыйтакö мыжаöсь и асьным, кор зэв кокниа öтдортчам чужан кывйысь да шуам: ме абу коми, ме роч, да уськöдчам корсьны шуд ылi муысь. Зывöктам ас кыв да челядьлы юрас сюям: тэныд коми некытчö оз ковмы, эн велöд. А тi медводз сетöй сылы кыдз позьö унджык тöдöмлун, тшöтш и чужан кыв кузя, а ныв-пиныд быдмасны да асьныс шуасны, колö ли оз. Гашкö, и «аттьö» на шуасны.
Ог кö асьным асьнымöс пыдди пуктöй, чайтанныд, мукöдыс пыдди пуктасны?
Лидия ЛИПИНА.