Неважöнсянь Дереваннöйса олысьяс юксисны кык пельö. Помкаöн лоис сійö, мый сиктса öти асшöр уджалысьлöн вежыс кутіс петны вöр юкöн вылö, кытысь дереваннöйсаяс вотöны тшак да тусь, кытысь эм позянлун босьтны керка-овмöс дзоньталöм вылö делöвöй вöр.
Индöм делянкасö таво сиктса олысьяслöн чукöртчылöм вылын шуим кольöдны сöмын тайö могъяс вылö. Но, вöлöмкö, законын урчитöма, мый овмöдчöминса олысьяс кö оз лоны паныд да сетасны ассьыныс кырымпасъяс, вöр юкöнсö позяс вуджöдны мöд категорияö, сідзкö, сэтчö вермасны пырны асшöр уджалысьяс. Мый и вöчис миян öти сюсь морт: кöсйысис олöмаяслы донтöм пес, томъяслы удж да чукöртіс кырымпасъяс, мед делянкасö киритны сиктлы торйöдöм категорияысь.
Тайö юалöм кузя дереваннöйсаяс чукöртчылім октябр 18-öд лунö. Рытыс, позьö шуны, юкис сиктсаясöс кык юкöн вылö. Öтияс паныдöсь асшöр уджалысьлöн вöзйöмлы, мöдъяс сувтöны сы дор. Урчитöм делянка сайын эм нöшта кык вöр юкöн, кытчö дереваннöйсаяс оз ветлыны, сэні тшак-вотöс абу, вöрыс пöрöдны позяна. Чайта да, асшöр уджалысь сэтчö пырны оз кöсйы, сы вöсна мый ковмас вöчны туй. А мый сиктсаяслы некысь лоас босьтны делöвöй вöр, мый пазъяс вотчанінъяс, сылы, буракö, веськодь. Мед босьтö вöрсö аукцион пыр, кыдзи вöчöны мукöд асшöр уджалысьяс, а оз разь ассьыс мытшöдъяссö сиктса олысьяслöн тшöт весьтö. Сійö пöрöдас вöр, вузалас, а ми колям потöм вор дорын.
Ме серти, тадзи вöчны оз позь. Сиктса олысьяслöн нимсянь, кодъяс сувтöны вöр юкöнсö асшöр уджалысьлы сетöмлы паныд, шыöдча районса власьт дорö: энö лэдзöй пузувтны Дереваннöйса став олысьлы сэтшöм колана вöр юкöн.

Василий Королёв,
Дереваннöй.