Октябр пансигöн Кужйысь Сергей Егорьевич Тарабукинлысь, кодi усис Афганистанын служитiгöн, мемориальнöй пöв öшöдiсны садлöн лунладор стенмö. Таöдз сiйö вöлi школаын, кöнi сiйö буретш велöдчылiс. Таво велöдчанiн тупкысьöм бöрын и шуисны вуджöдны садйö — йöзаинö. Казьтылан пöвсö öшöдiсны «Куж» овмöдчöминлöн администрацияын уджалысьяс. Вöлiны сэнi и садса уджалысьяс, челядь. Дзоридзьяс пуктiгмоз казьтыштiсны сиктса геройöс.
Сергей Тарабукинöс ас сиктсаясыс тöдöны, кыдз шань, тöлка, вежавидзысь зонкаöс, сiйö нинöмöн эз торъяв аслас класса ёртъясысь, радейтлiс чужан сикт, кытшалысь вöр-ва. Прöст кадö лэччылiс вуграсьны, чöсмöдлiс матыссаяссö чериöн.
1979-öд воын Сергейöс босьтiсны армияö. Таöдз сiйö велöдчис шофёрö, и машина вылö и индiсны. Служба пансигöн, кöнкö, эз куж мöвпыштны, кутшöм сьöкыдлунъяс пыр ковмас мунны. Афганистанö коми зон веськалiс учебка бöрын, 1980-öд вося майын. Ваялiс грузъяс да боеприпасъяс гöраясын тышкасьысь подразделениеяслы. Öти письмöын гортсаяслы гижис, мый ветлöдлö колоннаын дас витöдöн. Мöдын быттьö пырмунiгмозыс пасйис, мый öти тышын виисны ёртсö. Коймöдын кöсйысис: мойвиас кö волыны Москваö, бытьысь кежавлас гортö. Но эз артмы. 1980-öд вося сентябрлöн öти гудыр лунö сöветскöй войскалöн колонна вылö уськöдчисны душманъяс. Автоматöн омöля на водзсасян миномётöн да гранатомётöн шковгысь вöрöглы. Ёсь тышын усис уна салдат. На лыдын и Кужса зон — Сергей Тарабукин. Снайпер лыйис сылы да веськалiс дзик сьöлöм шöрас.
Бать-мамлöн шогыс вöлi помтöм. Сы вылö-ö чужтiсны-быдтiсны пинысö, медым томöн олöмсö сетiс йöз мувывса тышын да гортас вайисны сiйöс цинка гортйын? Афганистанын интернациональнöй мог олöмö пöртiгöн ыджыд повтöмлунысь Сергей Тарабукинлы вичмöдiсны Гöрд Звезда орден. Вайисны сiйöс мамыслы писö дзебöм бöрын ёна дыр мысти нин.
Кужса герой пыр кежлö коляс ас сиктсаяслöн сьöлöмын. Мемориальнöй пöв садлöн стенмö öшöдöмöн сiйö быд лун кутас паныдавны татчö локтысь верстьööс да челядьöс да ышöдны лючки овны. Торйöн нин зонпосниясöс, медым быдмисны кывзысьысьöн, Айму радейтысьясöн да сiйöс дорйысьясöн.

Галина НЕСТЕРОВА.
Снимок «Куж» овмöдчöминса администрациялöн.