Шонтöны мамлöн шальяс

[ A+ ] /[ A- ]

  • Сьöкыд вöлі челядьдырöй, а, гашкö, сiйö эз и вöвлы да. Кыдз тай помнита, век лои отсасьны бать-мамлы. Чойяс пиын вöлі медыджыд, со и тырмис уджыд, — тадзи аслас олöм йылысь босьтчис висьтавны Екатерина Александровна Холопова.
    Матыстчö чужан луныс, 90 арöс, и Анна Ильинична Адамовакöд пыравлiм видлыны олöма аньöс. Екатерина Александровна олö ныв гозъя дорас. Сiдз нин лоис, мый кушöдз сотчис эмбурыс, керка-картаыс. А гозъя вöлi видзöны мöскöс, порсьясöс, ыжъясöс. Öти здукöн би ньылыштiс ставсö, нинöм эз коль.
    Ань казьтывлö, мый Иван Сергеевич Холопов верöссö, сиктса ногöн кö, Сергей Ваньöс, сiйö аддзис рытпукигöн Севкымын. Зэв пö збоя, мичаа кодкö йöктiс, да нöшта на вомнас ворсiс гудöкöн. Видзöдлi пö зон вылö, и нэм кежлö «коли» синмöй. Гозъя öтув олiсны 57 во. Екатерина Александровна бура помнитö гижсян луннысö, тайö вöлi 1958-öд вося июнь 28-öд лунö. Озъягын олiгöн чужис куим челядь, Ручын нöшта кыкöн. Верöсыс вöлi зэв бур электрикöн. Ачыс ань уджавлiс нянь пöжаланiнын, садйын. Керка сотчöм бöрас верöсыс регыд кувсис.
    Екатерина Александровна чужлöма Керöс дорса ичöтик Эжöс деревняын Александр Павлович да Матрёна Васильевна Расовъяслöн семьяын. Вöлiны квайт чоя-вока. Сiйö коймöд, но нывъяс пиын медыджыд. Велöдчис нёльöд классöдз Лунпокаын. Нулiсны витöд классö Дереваннöйö, но нывка вöлi зэв полысь да бöр локтiс гортас.
    Уджавлiс «Красин» колхозын и видзьяс вылын, и кер дорын. Нёль тулыс олiс Расъёльын (Керчомъя дорын), лöсьöдiсны пуръяс, лэдзисны моль. Некытчö бокö эз ветлы. Коркö том нылöс, дзик öтнассö, мöдöдiсны Сьöдкыркöтшö кер дорö. Ок пö ёна полi, казьтывлö Екатерина Александровна. Сэнi тöдмасис Керчомъяса ас коддьöм нёль нывкöд, накöд и олiс да уджалiс. Шогпырысь казьтывлiс бать-мамсö. Вöлöм кыпöдöны зэв ыджыд керка (таöдз век олöмаöсь пöльыслöн керкаын), но висьмöма батьыс да кувсьöма 1939-öд воын. Керкаыс сiдзи и кольöма помавтöг. Мамыс эз вермы вештыны вот, да сiйöс пуксьöдiсны кöкъямыс во кежлö. Колисны квайт чоя-вока. А сэсся и война. Нуисны тышкасьны вöрöгкöд медыджыд Василий воксö. Медiчöт Лиза чойныс сэки вöлöма Шойнатыын детдомын. Нинöм пö сы йылысь эг тöдöй. Василий фронт вылö мунiгöн кежавлiс сы дорö, а сэсся юöртiс гортсаясыслы, мед дзик пыр босьтасны чойсö, кулас пö танi, сёйнысö нинöм.
  • Эг кö сэки босьтöй, код тöдас, кыдзи лоис, а со Лиза и öнöдз на ловъя, — висьталiс Екатерина Александровна.
    Василий усис война вылын. Сылöн ним, вич да овыс пасйöма Ручса обелиск вылын.
    Кык во пукалöм бöрын локтiс мамыс. Сiйö веськалöма унатор тöдысь да грамотнöй ань дорö, кодi гижöма доръяна письмö, медым Матрёна Васильевнаöс лэдзасны.
    Пукалö олöма ань диван вылын, киас кысянтор. Паськöдiм — а тайö мича узоръяса шаль. Вöлi пö 12 арöс, кор медводдзаысь босьтi киам ем, и со öнöдз, кор эм прöст кад, кыся, сёрнитö Екатерина Александровна. Медводдза носкисö кыöма Вась вокыслы война вылö мунiгас. Вежаньыс сетiс шöрт, кыны отсалiс пöчыс. А сэсся уна вонад унатор жö и кыис нывъясыслы: диван-крöвать, юрлöсъяс вылö эжöдъяс, кепысь-носкияс, шальяс. Челядь быдмисны, енсыкöдöн, зiльöсь. Ставныс ас семьяаöсь-котыраöсь. Екатерина Александровналöн 15 внук-внучка да 14 правнук-правнучка. Ань олö-красуйтчö Зинаида ныв дорас. Жырйыс пельк, мича, гöгöр сыöн кыöмторъяс. И миянöс эз коль козинтöг: кыскис ыджыд кöрöб, а сы тыр — мича сера кепысьяс, босьтöй пö месянь гöснеч.
    Ме казьтыштi, кыдзи волiм Рöштво бöрын куттяасьны да ставныслы (вöлi кöкъямыс зонпосни) сiдзжö козьналiс мича кепысьяс. Ань шуис: мед пö вежöр уджалiс, колö чуньястö легöдны (узортö öд колö думайтöмöн кыны), сы вöсна и ог дугды, мед надзöникöн, а кыа. И аслым пö нимкодь, кор кодлыкö козьнала.
    Пукалö Екатерина Александровна, а ме нимкодяся сы вылö: ок и мичаöсь олöма аньясыд, став сьöкыдсö мунiсны, а со кутшöмöсь — кужысьöсь да став рöдвужыслы коланаöсь. Ен мед сетас дыр на овны вöльнöй светас, мед мича сера носки-кепысьыс да шальясыс шонтасны унаöс на!
    Екатерина Ульнырова.
    Руч.
    Снимок гижысьлöн.

Комментарии:

Добавить комментарий

Свежий выпуск: за 7 ноября