Мед казьтывны нэмъяс чöж

[ A+ ] /[ A- ]

Немдiнса геройяслы казьтылана пас кыптiс паметь да слава паркын, кодлы подувсö сиктсаяс пуктiсны Ыджыд Вермöмсянь 70 во тыригкежлö. Сэки татчö вужйöдiсны 70 пу: пожöм, ниа, сус. Öнi парк шöрын гранитысь обелиск, кöнi мыгöръясыс Сöветскöй Союзса Герой Георгий Фёдорович Тимушевлöн да Слава Орденъяса тыр Кавалер Андрей Антонович Тимушевлöн. Сьöм, 300 сюрс шайт, торйöдiс республика, миян районса администрация йöзöс уджöдöмысь сетiс 35 сюрс. Чукöртiсны кодi уна вермис и асьныс сиктса войтыр. Позяна серти отсасис ветеранъяслöн райсöвет.
Тайö öтувъя памятник йывсьыс сёрни мунiс важысянь нин. И со сиктса администрацияöн веськöдлысь А.В.Пименовлöн водзмöстчöмöн казьтылана пасыс лоис. Колис сöмын пелькöдыштны гöгöрыс да водзö кутны дöзьöр улын. Мед эськö эз жö артмы челядьлы ворсанiнкöд да Вичко чуркса шойччанiнкöд моз: яндысьтöм йöз кыкнансö пыр и жуглiсны.
Сэк, кор вöлi ловъя на Георгий Фёдорович, ме волi налöн Москваса патераö. Герой буретш вöлi мунöма кытчöкö вöравны. Антонина Николаевна гöтырыс, кодi, вöлöм, сёрнитö жö комиöн, петкöдлiс нималана земляклысь наградаяссö, фотояссö да весиг тшын дукöн на öвтысь кыйсян-вотчан паськöмсö. Öти сайын гарыштiс, кутшöм пö бур, вöчны кö Георгий Фёдоровичлöн чужанiнас кöть нин ичöтик казьтылана пельöс. Музей сямаöс. Материалыс эм тай. Дерт, музей эз на артмы, но казьтылана пас Геройлöн чужан керка стенмын эм. Жаль, стрöйбаыс важ нин, коркö быть идраласны. А музейтö öд вöчны, керкасö лöсьöдны экскурсияяс нуöдöм вылö колö сьöм, и медтöдчанаыс рöдвужлöн сöглас.
Кудымкарын, медым нимöдны мир пасьта тöдса разведчик Николай Кузнецовöс, абу ырыштчöмаöсь ыджыд стрöйба вылö. Велöдчан кадся да таксаторöн уджаландырся керкасö и вöчöмаöсь музейöн. Ичöтик жыръясын син улад усьöны самöвар, пызанвывса лампа, картаяс, компас, вöрса паськöм — ставыс, мыйöн овлöма война вылас вöзйысьтöдз Коми Перымса зонка. Миян öмöй тадзисö оз артмы, оз чукöрмы Геройöс нöшта казьтыланторйыс?
Вячеслав Бабин.
Снимок овмöдчöминса администрациялöн.

Комментарии:

Добавить комментарий

Свежий выпуск: за 7 ноября