Дереваннöйса школаын 40-öд во нин уджалö роч кыв да литература велöдысьöн Галина Васильевна Халимоненко. 
Ачыс Аныбса, Дереваннöйö мöдöдiсны уджавны Коми пединститут помалöм бöрын 1980-öд воын. Мамыс да ыджыдджык чойыс сiдзжö вöлiны велöдысьясöн. Галина мунiс налöн туйöд. Медводдза велöдан во-ясö Галина Васильевналöн классас вöлiны 20 мортаöн. Таво — сöмын кыкöн: Марина Жикина да Иван Чувьюров. Велöдчöны витöд классын. 
— Маринакöд да Иванкöд уджавны лöсьыд, ме веськöдла налöн классöн. Ме кора, мед найö бура тöдiсны роч кыв, ёна лыддьысисны. Марина зэв нырччысь да петкöдчö быдлаын: челядьлöн Россияса öтмунöмын, школаса лесничествоын, хорын, «Ме дзоньвидзалун вöсна» да выльвося конкурсъясын, нöшта и велöдчö бура. Иван ёна радейтö лыддьыны фантастика. Челядь зэв шаньöсь. Велöдчöны окотапырысь, зiльöны. Ми восьлалам öнiя кадкöд öтвесьтын да вöчам быдпöлöс балаяс, презентацияяс, юржугланторъяс. Став уджсö нуöда сы могысь, мед челядь мичаа лыддьысисны, гижисны лючки-бура. Кора найöс лыддьысьны да ёртасьны книгаяскöд. Пыр вöзъя кутшöмкö бур книга, шуам, тшöкыда лыддям миян республикаса нималана гижысь Елена Габоваöс. 
Окота бур кывйöн пасйыны и миян школаса велöдысьясöс. Дереваннöйын зэв бур школа. Быд классын эм компьютер. Школа помалысьяс олöны быдлаын, эмöсь и Германияын, и Израильын. Миян жö школаысь петiс гижысь Алёна Митина. Öнi олö Латвияын. Немдiнын уджалö роч кыв да литература велöдысьöн В.А.Расов. Локтiсны том велöдысьяс Т.Ю.Тимофеев, В.М.Игнатова, М.В.Попова. Зэв сьöлöмсянь уджалöны, а ми видзöдам на вылö да босьтам аслыным мыйкö выльтор, велöдчам öта-мöдлысь. Зэв нимкодь, мый школаö бергöдчöны миян воддза велöдчысьяс, — висьталiс Галина Васильевна. 
Гижöд да снимок Галина Клюжевалöн.