[ A+ ] /[ A- ]
- Öтлаын снимайтчыны челядьлы сетi волейболысь ворсöм кузя ордйысьöмъясысь да вермöмъясысь медальяс. А тайö жö пö тэнад. Менам олöмын, мися, медся ыджыд вермöмыс да озырлуныс — тi. Ме ачымöс кыла шудаöн. Орччöн нёль дзоньвидза ныв-пи, муса верöс, сьöлöм серти удж. Кöсъя, мед шудаöн вöлiны и челядя нин, и аскиа мамъяс, сёрнита нöбасьысь аньяскöд, мед эз вöтлыны рушку, — кыпыд ловкылöмъясöн висьтасис Кулöмдiнысь Наталья Николаевна Паршукова, кодi шöр бурдöдчанiнын уджалö акушеркаöн.
Сыктывкарса медучилище бöрын том специалистöс ыстiсны Мысса фельдшерско-акушерскöй пунктö, овмöдiсны ас керкаö. Тайö сиктын и аддзис ассьыс шудсö. Тöдмасис Иван Фёдоровичкöд. Бурдöдчанiнö волiгöн мысса олысьяс пыр и юöртiсны, бур семьяысь шань да зiль морт пö. Йöзöн висьталöмыс пыр и тыдовтчис. Ас вылас босьтiс и пес, и ва да айловлысь став удж. Наталья Николаевна гöгöрвоис, мый тайö ыджыд тöжда мортыскöд лоас бур аскиа олöм. Регыдъя кадöн и гижсисны. Сэсся том аньöс ыстiсны уджавны Кебанъёльса бурдöдчанiнö, вуджöдiсны Кулöмдiнö.
Чужисны Никита, кодлы локтан воын лоас 14 арöс. Сэсся Кирилл, Настя да Маша. Куим ыджыдыс велöдчöны нин. Маша котралö садйö. Наталья Николаевна ветлö «Олимпик» ёнмöдчанiнö. Ворсö волейболысь, пырö бурдöдчанiнлöн да спортын ветеранъяслöн, а танi 35 арöссянь лыддьыссьöны ветеранъясöн нин, котыръясö. Буретш спортса ветеранъяскöд петкöдчöны республика тшупöда ордйысьöмъясын. Мам вылö видзöдöмöн ёнмöдчанiнö котралöны и Кирилл да Настя. Зонка вермасьö самбоöн, нывка бöрйис гимнастика. Челядькöд öтлаын пöжасьöны да вöчöны мукöд удж. Кыпыда пасйöны чужан лунъяс. Но медся ёна радейтöны ставныс волыны «Олимпикö» видзöдны да «висьны» ордйысьöмъяс вылын, гожöмын лэччылыны ва дорö, ветлыны челядьлöн паркö.
Гижöд да снимок Марина Дадашовалöн.
Комментарии: