Талун Кекурын

[ A+ ] /[ A- ]


*Кекур грезд сулалö Эжвалöн шуйгаладорын. Пырö «Пожöг» овмöдчöминö. Медводдзаысь казьтыштöма 1916 воын: 73 овмöс, 383 олысь. 1970-öд воын Кекурын олiсны 482-öн. Талун артавсьö 386 морт, 167 овмöс. Уджалан арлыдаыс 199-öн, 112 олöма морт.
*Йöз уджалöны Пожöгса садйын, лавкаясын, шойччан шöринын, ветлывлöны вахтаöн бокö.
*Челядь велöдчöны Пожöгса школаын. Кольöм воын Кекурысь Александр Фёдорович Третьяков помалiс 11-öд класс, сiйö лыжи кузя спортса мастерö кандидат. Школалы тайö медводдза ыджыд шедöдöмтор спортын. 9-öд класс помалöм бöрын мунiс велöдчыны артистö Владислав Дмитриевич Шахов, кодi школаын велöдчигöн пыр быдлаын петкöдчис.
*Кекурса садйö котралöны 13 ныв-зон. Сэнi уджалö сизим морт.
*Грездын медся ыджыд арлыдаяс Евдокия Арсентьевна Шахова, кодлы февраль 2-öд лунö тырис 87 арöс, да Мария Ивановна Шахова, сылы февраль 5-öд лунö тырис 89 арöс. Медся ичöтыс Ефрем, чужис таво сентябрын.
*Кекурысь петлiсны нималана йöз. Вера Николаевна Уляшева вöлi СССР Верховнöй Сöветса депутатöн. Евдокия Арсентьевна Шахова быдтiс сизим челядьöс, сылöн эм коймöд тшупöда «Материнская слава» медаль. Пётр Федотович, Борис Федотович Шаховъяс да Александр Михайлович Лужиков — гижысьяс. Нина Алексеевна Сенькина, Нина Дмитриевна Шахова — машинаöн лысьтысьöмын мастеръяс. Иван Дмитриевич Уляшев 40 во уджалiс «Пожегодскöй» совхозын, сэсся видз-му овмöс коо-перативын трактористöн. Дмитрий Егорович Мингалёв уджалiс промышленность да транспорт министерствоын, Россияса вöр промышленносьтын пыдди пуктана уджалысь. Мария Фёдоровна Шахова лоö Коми республикаса пыдди пуктана уджалысьöн.
*Грездын куим лавка могмöдöны йöзöс сёян-юанöн да овмöсын колана мукöдторйöн. Нянь вайöны «Барс» котырлöн нянь пöжаланiнсянь да «Сыктывкархлеб» котырсянь.
*Эм фельдшерско-акушерскöй пункт, кодöн веськöдлö Яна Алексеевна Третьякова. Вöчöны уколъяс да капельницаяс. Бурдöдчанторъяс йöз босьтöны Пожöгса больничаысь. Тэрыб отсöг сетан машина волывлö Помöсдiнсянь да Пожöгсянь.
*Лариса Васильевна Шахова, Екатерина Алексеевна Лужикова да Ирина Васильевна Уляшева быдтöны куим челядьöн.
*Асшöр уджалысьясöн лоöны Агния Михайловна Шахова, Ольга Николаевна Попова да Александр Анатольевич Попов. 2017-öд воын крестьянин овмöс восьтiс Анна Семёновна Миронова.
*Бöръя кадöн чужис кык семья. Керка кы-пöдiсны Роман Леонидович да Алёна Александ-ровна Чисталёвъяс гозъя.
*Кекурын вит во нин уджалö шойччан шöрин, бöръя куим восö сыöн веськöдлö Роза Вилениновна Уляшева. Ачыс жö нуöдö «Кужысь кияс» кружок. Сэтчö волывлöны челядь и верстьö. Позьö ворсны пызанвывса теннисöн. Асшöр уджалысь Александр Анатольевич Попов козьналiс тренажёръяс, код вылын окотапырысь ёнмöдчöны гырысь класса велöдчысьяс. Эм лыддьысянiн, сэн уджалö Полина Борисовна Сенькина. Сьылöны-йöктöны да лöсьöдöны сцена вылын ворсанторъяс челядьлöн «Колосок» да верстьöяслöн «Девчата» да «Майбыр» котыръяс. «Колосок» котырын ворсöны зэв бура гитара вылын Семён да Павел Чупин вокъяс.
*Олöмаяслöн котырöн веськöдлö Янина Николаевна Уляшева.
*Йöзöс Кулöмдiнöдз новлöдлö асшöр уджалысь Александр Михайлович Игнатов. Сыктывкарö ветлöдлöны таксиöн.
*Тöвнас туйяс весалö «Пожöг» овмöдчöмин да туйяс вöчан да дзоньталан Кулöмдiнса участок.
*Челядьлы эм ворсанiн, сiйöс колö бура дзоньтавны.
Галина Клюжева.

Комментарии:

Добавить комментарий

Свежий выпуск: за 7 ноября