Редакцияö уджавны локтiгöн Елизавета Изосимовнва Гуляева сэн нин вöлi — корректоралiс, стöчджыка кö, корсялiс да правитiс газет лист бокъясысь öшыбкаяс. Ас костын ми сiйöс шмонитöмöн шулiм «словарöн». Крукасьлiм гижанногнас кутшöмкö кывйö, сы дорö шыасьлiм. А ачыс кö эз куж висьтавны, пырысь-пыр восьтывлiс пызан вылас куйлысь кывкудсö да отсöгтöг сы дорысь эг жö мунлöй. 
Но медсясö уджъёртъяс Елизавета Изосимовнаöс шуисны «Лизукöн». Öнöдз тадз тöдам. Ме серти, та-тшöм нимыс сылы шедiс аслас рамлунсьыс. Комын сайö во вöлiм öтувъя котырын, уджалiс олöмаяскöд и томъяскöд, и некор эг кывлы дöзмана сёрни. Корректорлöн удж помасьлiс редакциясаясысь медсёрöн, кытчöдз газет эз во печатайтан машина вылö. Елизавета Изосимовналöн удж помыд вöлi вой шöрын, а то и бöрас на. Тшöкыда куслiс би, строкаяс лэдзысь машиналöн кынмывлiс сплавыс. Би сетöм бöрын сылöмсö виччысисны кык час. Жугласисны машинаяс, лöсьöдöм вылö бара жö мунлiс кад. Механик лоис сöмын Ленин уличавывса выль уджаланiнын нин. Важас, жугалас кö, мырсисны- вöчисны асьныс, эз кö артмы, корсьлiсны кужысь мортöс. Со тадз и уджалiсны. Елизавета Изосимовна гортас волiс, кор пияныс узисны нин. Вöлi уна челядя мамöн, но эз корлы некутшöм личöд. Шойччан лунъясö öтув жö петавлiс совхозлы заптыны кöрым, керны картупель, мукöд удж вылö. 
— Яслиын да больничаын уджалiгöн помалi шöр тö-дöмлунъяс сетан рытъя школа. 1961-öд вося ноябр 1-öд лунö локтi редакцияö. Но газетса шöр редактор Николай Трофимович Пунегов, кодi кывкутiс редакциялöн и типографиялöн удж вöсна, индiс типографияö. Велöдысьöн вöлi Роза Ильинична Гичева. Öттшöтш гижышталiс. Недыр мысти редактор вуджöдiс редакцияö корректоравны. Уджалiм Луиза Васильевна Пунеговакöд, редакторлöн гöтыркöд, а сэсся колисны öтнамöс. Тайö удж вылас менам коли 28 во, дугдöм бöрын 10 во на пелькöдi редакциялысь жыръяс. Ясли да больнича босьтöмöн, став уджалан кадöй 44 во, — казьтывлö Е.И.Гуляева. 
Öнi сiйö олö Кебанъёльын пи семьяас. Елизавета Изосимовна лоö редакцияса ветеранъяс пöвстын медыджыд арлыда мортöн, кодлы мойвиис лэдзны «Вöр фронт», «Ленин туйöд» да «Парма гор» районса газет. Кузь нэм, Лизук! 
Нина Буткина. 
Снимок вылын: Е.И.Гуляева.