Чужан лунöн, «Парма гор»!

[ A+ ] /[ A- ]

Талун, ноябр 7-öд лунö, Кулöмдiн районса газетлöн медводдза номер петöмсянь тырö 90 во. Вель тöдчана тшупöда пас, код сайын — уна йöзлöн öтувъя удж.
Газет вöчöны оз сöмын журналистъяс, танi пай и газет тэчысьлöн (верстайтысьлöн), и печатайтчысьлöн, и корректорлöн, и бухгалтерлöн, а сiдзжö внештатнöй корреспондентъяслöн да газетлы отсасьысьяслöн.
Талунъя газетлы зумыд подув пуктысьясöн лоисны вöвлöм уджалысьяс: В.Г.Лодыгин, Н.А. да Л.И.Лютоевъяс, Н.И.Буткина, В.Л.Бабин, Э.А.Тимушев, В.А.Кирушев, Г.П.Нестеров, А.В.Шебырев, В.В.Уляшев, газет верстайтысь Т.Б.Гилева, главнöй бухгалтер Е.Н.Выкрикач, корректор Е.И.Гуляева да мукöд.
Типография тупкысьтöдз редакция век вöлi топыд йитöда сэтчöс уджалысьяскöд. Медбуръяс лыдын тайö котырын вöлiны А.Е.Мингалёва, К.А.Чисталёва, Н.А.Русинова, А.А.Тимушева, Л.А.Лодыгина, М.И.Кирушева, Э.Е.Лопухова, В.В.Попвасев, Е.А.Попова, М.В.Шахова.
Газет лоö рöмпöштанöн, кодi петкöдлö районлысь быдлунъя олöм, юöртö выльторъяс да тöдчана лоöмторъяс йылысь, гижö сиктса шань йöз йылысь, кодъяс, сьöкыдлунъяс вылö видзöдтöг, лоöны олöм кутысь-пыкысьясöн. Ог кольччöй бокö и йöзлöн тöжд-могъясысь: тшöкыда районса олысьяслöн корöм серти разям сiйö либö тайö мытшöдъяс, сьöлöмöн висям да зiлям отсавны. И миян тайö артмö. Буретш та вöсна медыджыд чолöмалöмъяс да бурсиöмъяс — «Парма гор» газет лыддьысьяслы! Öд миян уджным — сöмын тiянлы, «районка» лыддьысьяслы да радейтысьяслы, пыдди пуктысьяслы да уна во судзö-дысьяслы!
Виктор Остряковлöн снимок вылын редакцияса уджалысьяс:
(медводдза радын шуйгавывсянь) Л.Е.Липина, Г.И.Нестерова;
(мöд радын шуйгавывсянь) Г.Н.Лютоева, Г.Н.Клюжева, М.Н.Павлова, Е.А.Пименова, О.А.Уляшева, М.Ю.Дадашова.

Комментарии:

Добавить комментарий

Свежий выпуск: за 7 ноября