Татьяна Владимировна Уляшевакöд тöдсаöсь важöнкодь. Сійö – Помöсдінса шöр школаын коми кыв да литература велöдысь, коми кыв вöсна зэв ыджыд тöжда морт. Школаын велöдчигöн мöвпаліс мунны шылад велöдысьö, сы вöсна мый велöдчис ворсны баянöн да мичаа сьыліс. Но велöдысьыс бöрыньтіс: мед пö тайö ставыс лоас лов кыпöданторйöн, но уджтö бöрйы мöдöс. Татьяналы сьöлöм вылас воисны коми кыв да литература (велöдiс Степан Иванович Размыслов). 10-öд классын кыдзи коми кыв кузя бура велöдчысьлы мойвиис ветлыны Финляндияö. 1995-öд воын пырис Сыктывкарса университетö во сайын воссьöм финн-йöгра факультетö. Помöсдінса школаö велöдны корис директор Фрида Эмануиловна Линдт. Татьяна Владимировна локтіс чужан сиктö да лоис шудаöн. Таво коми кыв велöдысьяс пöвстын республикаын лоис медбурöн. 
Татшöмсö бöрйисны апрель 2-4-öд лунъясö Сыктывкарын. Конкурс муніс нёльöдысь. Медводз коми кыв велöдысьяс да садса воспитательяс мöдöдісны ас йывсьыныс юöр да кык уроклысь конспект. 34 мортысь донъялысьяс бöрйисны 13-öс. Ассьыныс сям петкöдлісны Сыктывкарысь, Усинскысь, Интаысь, Ухтаысь, Лузаберд, Изьва, Удора, Сыктывдін, Кулöмдін, Мылдін, Емдін районъясысь кöкъямыс велöдысь да вит воспитатель. 
Со кыдзи Татьяна Владимировна гижис ас йывсьыс: «Таво ме 19-öд во велöда чужан сиктса школаын, муса Помöсдiнын, коми кыв да литература. Век на чайтсьö, мый быттьö муртса на локті чужан школаö кыдзи велöдысь да урокъяс кежлö дасьтысигöн нинöм ог тöд. Та вöсна быд урок кежлö дасьтысигöн лоö лыддьыны, корсьны выльтор. 
Талунъя велöдысьлы колö сетны челядьлы оз сöмын тöдöмлунъяс, но и велöдны мöвпавны да быд боксянь донъявны олöм. Велöда радейтны да пыдди пуктыны чужан му да чужан кыв, тöдны пöль-пöчьяслысь оласног, чужан сиктлысь кольöм кад, сэнi олысь нималана да талун нимöдысь войтырöс. Выль олöм важсö тöдтöг оз артмы. Та вöсна челядьлы колö уна висьтавны комияслöн важ олöм йылысь. Тайö и нянь быдтöм, и дöра кыöм, и вöралöм, и уна мукöдтор. Ёна отсалö школаса чужан му туялан музей, кöнi нуöда коми кыв да литература кузя урокъяс. Лыддя, мый найö зэв коланаöсь. Музейын нуöдöм урокъяс бура кольöны челядьлы вежöрö. /ти боксянь кö, нимкодь, мый коми сикт оз кöсйы кольччыны карысь. Сiйö сöвмö, быд керкаын шоныд асмогасянiн, воö ва. А мöдар боксянь кö, бырö, вошö коми ру, коми оласног. Та вöсна челядьлы колö нин висьтавны турун пуктöм, карнанöн ва ваялöм да уна мукöдтор йылысь. А кöнi сёрнитан та йылысь? Дерт жö, коми кыв да литература кузя урок вылын. 
Коми литератураысь урокъяс, медся нин гырысь классъясын — быдлунъя олöмлöн урокъяс. Коми гижысьясöн петкöдланторъяс, коми сиктъяслöн нэмöвöйся оласног, тöрытъя да талунъя геройяс йылысь мöвпалiгöн велöдчысьяскöд зiлям гöгöрвоны талунъя олöм. Тадзсö челядь збыльвылö матысмöны геройяс дорö, пырöдчöны гижöдö, мöвпалöны талунъя олöм йылысь, гöгöрвоöны ассьыныс, ёртъясныслысь, рöдвужныслысь олöмын бергöдчöмсö, вöчöны кывкöртöдъяс. Чайта татшöм урокъяссö (сёрнияссö) сöвмысь вежöрлы зэв коланаöн. 
Коми кыв да литература урокъяс — тайö и коми культураöн, искусствоöн тöдмöдан урокъяс. Ми сёрнитам и серпасалысьяс, и шылад тэчысьяс йылысь. Кывбуръясысь лöсьöдöм сьыланкывъяс ог сöмын кывзöй, но и сьылам. Корсюрö ачым ворса баянöн, а челядь сьылöны. 
Ми семьяöн радейтам шойччыны вöрын, Чер ю йылын, кыям чери, велöдам челядьöс овны вöрын: пестыны бипур, пусьыны, овны-нимкодясьны вöр-ваöн. И вöрö быд ветлiгöн ме тöдмала сылысь гусяторъяс, пемöсъяс, чери кыйöм йылысь выльторъяс. Тöдмöдö верöс, кодлöн вужйысь ставныс вöлiны кыйсьысьясöн. Тайö ставыс ёна отсалö велöдiгöн. Кор ме медводдзаысь кайи Чер йылö, аддзи юыслöн öтар и мöдар боксьыс джуджыд кыръяс, и пыр жö воисны Тима Веньлöн «Трипан Вась» висьтысь кывъяс: «Векньыд уйтаöсь ю йывъяс. /тмöдар боксяньыс слудаяс ю пöлöн. Воргатi моз сэт визувтö ваыс. Зэв нин шочиника, кытсюрö сöмын, ылыстчылас ю дорысь слудаыс, и бара топалö…» Менö сiйö здукас весиг йирмöгалiс сiйö мöвпсьыс, мый Тима Вень, вермас лоны, катлiс татi, кыдзи и Трипан Вась… И та йылысь, дерт, висьтала челядьлы, тöда, кутшöм сьöкыд катны ю йылö… 
Но талунъя велöдысьлы колö бура тöдны и став выльсö. Та вöсна уна корсьыся, лыддьыся интернетысь, пырöдча конкурсъясö, велöдча коми кыв да литература мукöд велöдысьлысь. Медъёна сьöлöм вылö воö ставсö ас вежöрöн донъялöм. Таö велöда и челядьöс, мед тырвыйö восьтiсны асьнысö, повтöг юксисны асланыс мöпъясöн, вöчисны кывкöртöдъяс. 
Ышöдöм могысь лöсьöда быдсикас шензьöданторъяс, ворсöмъяс. Мыйсюрö челядь вöчöны и асьныс. 
Ичöтджык пиöй регыд на шуис: «Мамö, ме кöсъя вöчны кадлысь машина. Мый эськö тэ вежин, позис кö, аслад олöмысь?» Мися, нинöм эськö эг веж. Ставыс, мый эм талун кежлö – менам олöм. Ме шуда, мый ме мам, гöтыр и велöдысь. Шуда, мый сёрнита ас кывйöн да велöда таö Помöсдінса челядьöс, позьö шуны, йита важсö да выльсö, ог сет вунöдны налы ассьыныс вужъяс». 
Ордйысисны куим лун. Медводдза лунас велöдысьяс да воспитательяс «висьталісны» ас йывсьыныс коді кывбурöн, коді сьыланкывйöн. Татьяна Владимировна висьтасис сьылöмöн, кывъяссö гижисны Ксения Ивановна Карманова да Ольга Владимировна Рогожникова. Аккордеонöн ворсіс Анфиса Васильевна Чисталёва. Та бöрын конкурсын петкöдчысьяс чукöртчылісны «гöгрöс пызан» сайын. Сёрнитанторйöн вöлi «Сöмын чужанінас сылöн шудыс, кодлöн коми вужйыс век на ён» медшöр мöвп. Быдöнлы коліс висьтавны, кыдзи сійö гöгöрвоö тайöс. Татьяна Владимировна висьталіс Помöсдін вож йылысь, коді олö сиктса коми руöн на. Тані челядь тöдöны ассьыныс вужъяс, öд школаын нуöдöны талы сиöм урокъяс. Ыджыд пай нэмöвöйся оласног кутöмö пуктö кыйсьысьяслöн котыр, коді пырöдчö сиктса быд гажö да нуöданторйö. Батьяс да пöльяс асланыс бур оласногöн петкöдлöны пиянлы, кыдзи видзны вöр-ва, коді вердö и юкталö, öд коми мортлöн олöмыс сыкöд торйöдны позьтöм. Верстьöысь оз кольччыны и томъяс, кодъяс оз мунны кытчöкö, а тэчöны шуда олöм чужанінын. «Аскиалун» котыр ыджыд тöжда сикт да овмöдчöмин вöсна. 
Мöд лунас конкурсö пырöдчысьяс сетісны урокъяс да петкöдлісны, кыдзи уджалöны садйын. Татьяна Владимировна урок вылын сёрнитіс Александр Васильевич Шебыревлöн мöвпалана кывбуръяс йылысь 10-11-öд классъяс водзын искусствояслöн гимназияын. 
— Урок кежлö дасьтысигöн, дерт жö, сёрниті Александр Васильевичкöд. Юаси сылысь аслас кывбуръяс йылысь мöвпъяссö. Юрын бергöдлi, кыдзиджык висьтавны велöдчысьяслы, медым кывбуръясыс лоисны налы гöгöрвоанаöсь, воисны сьöлöм выланыс, туйдісны мöвпавны, — висьталіс Татьяна Владимировна. – Челядь уджалісны зэв бура, сюся кывзісны, лючки вочавидзисны юалöмъяс вылö. Тыдаліс, мый найö бура тöдöны литература. Дерт, полышті, гöгöрвоасны-ö томулов тайö кывбуръяссö. Ме серти, урок вöрзьöдіс налысь сьöлöмъяс, а кодсюрö аслыныс «восьтісны» выль поэтöс. Эска, мый А.Шебыревлöн кывбуръяс лоасны налы матысöсь да радейтанаöсь. Козинöн лоис поэтлöн видеогижöда чолöмалöм да гитара улö сьылöм. 
Урок бöрын велöдысьлы коліс аскоддьöмъяс водзын донъявны ассьыс уроксö, висьтавны, мый артмис, а мый эз, пöртіс-ö олöмö ас водзас сувтöдöм могъяс. Татьяна Владимировна висьталіс, мый аслас сьöлöмыс бурмис сетöм урокысь, сійö муніс кыпыда, öти ловшыöн. 
Конкурслöн коймöд лунö висьталiсны, мый вöчöны сы могысь, медым висьталантор йиджис челядьлы вежöрас. Т.В.Уляшева тайöс петкöдліс В.Т.Чисталёвлöн «Кодзув пи» пьеса серти дасьтöм урокöн. 
Кыдзи пасйим нин, куим лунся уджлы кывкöртöд вöчöм бöрын Татьяна Владимировна Уляшева лоис медбурöн. Сылы вичмисны диплом да сьöма сертификат, козинъяс. Сылы вöзйисны петкöдлыны республикаöс чужан кыв велöдысьяслöн Москваын чукöртчылiгöн. 
Со мый висьталіс Татьяна Владимировна конкурс йылысь: 
— Кор вöзйисны пырöдчыны конкурсö, ыркнитліс сьöлöмöй, öд тайö зэв ыджыд кывкутöм. Шуи видлыны, дасьтыси. Зэв ёна воис сьöлöм вылö, кыдзи котыртöмаöсь конкурссö. Таын пайыс велöдöм сöвмöдан институтысь этнокультура велöдан лабораторияöн веськöдлысь Екатерина Валерьевна Поповалöн. Ме серти, бур вöлі, татшöм конкурс вылö кö воліс коми кыв став велöдысьыс. Унатор позьö босьтны аслад уджö, мыйöкö велöдчыны, пыртны выльторъяс. 
Зэв ыджыд аттьö конкурс кежлö дасьтысьны отсалöмысь Помöсдінса школаысь завуч Любовь Васильевна Бизиналы, коми кыв велöдысьяс Диана Алексеевна Гребенюклы (Руч), Ирина Андреевна Кузнецовалы (Керчомъя), Августа Серафимовна Поповалы (ачыс Пожöгса, уджалö Сыктывдін районса Паль сиктын), петкöдчыны отсалысьяс Анфиса Чисталёвалы, Ксения Кармановалы, Ольга Рогожниковалы. Урок кежлö дасьтысьны отсалöмысь аттьö Помöсдінса школаысь коми кыв велöдысь Ольга Владимировна Шебыревалы. Буретш Ольга Владимировна отсаліс меным вöчны медводдза воськовъяс кыдзи велöдысьлы, кор ме университет помалöм бöрын локті Помöсдінö. Ме верми налöн ыджыд отсöгöн, сьöлöм сетöмöн. 
Лидия ЛИПИНА. 
Снимок вылын: Т.В.Уляшева – медбур велöдысь; Т.В.Уляшева Сергей да 
Арсений пияныскöд сентябр 
1-öд лунö.