2018-öд воын велöдысьяслöн районса конкурсын вермис Кулöмдiнса шöр школаысь Ольга Михайловна Сковородникова (снимок вылын). Сiйö и петкöдчис тавося апрельын Сыктывкарын республикаса «Медбур велöдысь» ордйысьöмын. Конкурс мунiс 28-ысь нин, и сöмын таво медводдзаысь вермис миян районса школаысь велöдысь. Ас кадö лауреат нимъяс босьтлiсны химия велöдысь О.В.Ямщикова да ичöт классъяс велöдысь К.В.Катышева. Ольга Михайловна велöдö 2-11-öд классъяслы йöз кыв 13 во. Муслунсö тайö кыв дорас чужтiс Кебанъёльса школаын велöдчигöн на велöдысь В.Н.Момина. Коми пединститут помалöм бöрын бергöдчис чужанiнас. Та мында воöн чукöрмисны районса да республикаса тшупöда грамотаяс, но татшöм ыджыд вермöмыс медводдзаысь. Сетiсны медаль. 
Конкурс мунiс кык тшупöдöн. Колiс дасьтыны индöм тема серти гижöд да лöсьöдны урок нуöданног. Апрель 8-12-öд лунъясö карын мунiс мöд тшупöд. Велöдысьяс сетiсны урок да петкöдлiсны урокбöрса удж. Ольга Михайловна нуöдiс Австралия кузя ворсöм. Та бöрын 20 велöдысь пиысь бöрйисны 8 лауреатöс, кодъяслы колiс вöчны мукöд корöмъяс: дасьтыны велöдан бала да бöрйöм тема серти нуöдны мастер-класс, сёрнитны велöдöм кузя министркöд. Тайö лунъясö О.М.Сковородниковакöд пыр вöлiны орччöн да отсалiсны школаса директор О.В.Пунегова, методика удж кузя директорöс вежысь Л.И.Стрельникова, химия велöдысь О.В.Ямщикова, физика велöдысь Е.С.Мингалёва. 
— Миянöс чукöртлiсны мартын, кöнi велöдiсны, кыдзи петкöдчыны татшöм ордйысьöмъясын. Сэки тöдмаси конкурсö пырöдчысьяскöд. Конкурс дырйи вöлi зэв шань аслыспöлöс ру. Йöзыс бурöсь. Тöдмалiм, кыдзи талун уджалöны мукöд школаяс. Эг вермы весиг мöвпыштны, мый верма. Ёна чуйми. А менам рöдвужлы вöлi зэв нимкодь, найö эскисны меö медводдзасяньыс. Татшöм петкöдчöмъяс отсöгöн быдман кыдзи велöдысь, тöдмалан уна выльтор. Тайö вермöмыс сетiс содтöд вын. /нi тöда, мый вылын кута уджавны водзö. /нiя кадö ыджыд тöдчанлун босьтö йöз кыв велöдöм. Тайö кывсö тöдöмыс, дерт, ковмас водзö олöмын, — висьталiс Ольга Михайловна. 
О.М.Сковородникова петкöдлас республикаöс ставроссияса ордйысьöм вылын, кöнi петкöдчас 80 сайö велöдысь. 
Галина КЛЮЖЕВА. 
Снимок интернетысь.