Пожöгысь Татьяна Ильиналы öкмыс арöс, велöдчö коймöд классын. Сямнас йöз водзын петкöдчö нёль арöссянь. Медводдзаысь петiс кывбурöн, лыддис Александр Лужиковлы чужöмсяньыс 50 арöс тырöм пасйигöн. Та бöрын культура керкаысь художествоа веськöдлысь Е.А.Уляшева корис волывлыны да сэсянь пыр сэнi. Гажöдöны оз сöмын гортын, но и йöзын. Некымынысь ветлiс «Енбиа челядь» ордйысьöм вылö. Тавося мартын лоис мöдöн. Кольöм воын ветлiс юркарö «Ёртасян кытш» гаж вылö да лоис коймöдöн. Сьöлöм вылас ёна воöны коми сьыланкывъяс. Культура керкаö ветлö нимкодьпырысь, синъясыс öзйöны. Сылы муса Екатерина Алексеевна велöдысьыс. Гортас уна нин диплом да аттьöалан гижöд. Сьылöм кындзи гижö неыджыд висьтъяс. 
Со кыдзи висьталiс Таня йылысь Екатерина Алексеевна: 
— Татьяна Ильина ичöтсянь волö культура керкаö сьывны. Петкöдчö дзик быд гажын. Некымынысь нин сьылiс «Енбиа челядь» гаж вылын. Таво лоис мöдöн. Кольöм воын Сыктывкарын «Ёртасян кытш» ордйысьöм вылын Таня лоис коймöдöн. 
Кулöмдiнысь Дария Логунова «Том енбиаяс» ордйысьöмын лоис медводдзаöн. Велöдчö витöд классын сöмын «5» вылö. Коймöд во нин ветлö культура керкаö сьывны. Сiйöс велöдö Ирина Александровна Гулько. Налöн «Божья коровка» котыр. Дария сьылö и öтнас. Сьöлöм сертиыс лöнь сьыланкывъяс. Медводдзаысь локтiс бать-мамыскöд. Медводдзаöн лоöмыс ышöдö сьывны нöшта бурджыка. Медся казьтылана тайö петкöдчöмыс, а сiдзжö «Василёк» гаж, кöнi тöдмасис уна челядькöд. Дария сiдзжö серпасасьö. Босьтны кö велöдчöм, медся радейтанаясыс йöз кыв да сьылöм. 
— Дашук босьтчис сьывны школаын велöдчигöн Евгения Васильевна Катышева дорын. /нi ветлö культура керкаö вежоннас куимысь, ёна мудзö, но ставсö удитö. Ыджыд аттьö И.А.Гульколы Дашаöс котырас босьтöмысь. Гаж видзöдiгöн петiс весиг синваöй, сэтшöм долыд лоис нылöйлöн сямысь, — висьталiс Светлана Александровна мамыс. 
Галина КЛЮЖЕВА. 
Гижысьлöн снимокъяс вылын 
Татьяна Ильина; Дария Логунова.