Подöн тöдöмлунла

[ A+ ] /[ A- ]


Надежда Александровна Турьева чужис 1933-öд вося сентябр 23 лунö Носимын. Война вылö батьсö босьтiсны 1943-öд вося февраль 23 лунö. Квайт тöлысь мысти воис юöр, мый батьыс вöрöг пуля помысь кулiс Смоленск обласьтын. Война пансигöн Надежда Александровна вöлi ичöт на да омöля тöдö челядьдырсö. Ыджыд тыш кусiгöн велöдчис нёльöд классын. Вöлi мунö урок. Кодкö таркöдчис öдзöсö. Велöдысь петiс классысь да эз пыр бура дыр. Кылiс бöрдöм шы. Вöлöмкö, школаö локтöма война вылö ветлысь Валентина Николаевна Тарабукина да висьталöма, мый воис Победа лун. Пырис велöдысь Елена Ивановна да шуис, мый талун урокъяс оз лоны. Челядьöс ыстiс гортаныс да тшöктiс ставныслы висьтавны война кусöм йылысь. Нывка мунiс Анна тьöткаясас, сэнi мамыс да некымын нывбаба мыськалiсны керка. Надежда горöдiс: «Вайи бур юöр, помасис война!» Нывбабаяс кутiсны бöрдны нимкодьысла. Тайö луныс аньлöн öнi на син водзас.
Надежда Александровна помалiс сизимöд класс, кöсйис лоны ичöт класса челядьöс велöдысьöн. Сыктывкарö ыстiс документъяс. Воис вочакыв, мый велöдчöмысь быть колö вештысьны. Семьяын эз вöв сьöмыс. Ковмис кольччыны сиктö отсасьны мамыслы. Уджыштiс колхозын, а сэсся «Вöр фронт» газетысь лыддис, мый Уллянаса училищеö корöны велöдчыны бухгалтерö. И со нывъёрткöд подöн мöдöдчисны тöдöмлунла. Овмöдiсны öтувъя оланiнö. Асьныс ломтiсны пач, век вöлi кöдзыд да кынмалiсны ёна.
Во велöдчис, а 1953-öд вося март коймöд лунö Надежда Александровнаöс босьтiсны августöдз уджавны сельпоын. Сентябрын лэччис Сыктывкарса кооперативнöй техникумö да во велöдчис бухгалтерö. Уджалiс Кулöмдiнса сельпоын квайт во да джын. 1957-öд воын петiс верöс сайö. Быдтiсны куим ныла-пиаöс. Кулöмдiнö челядьöн ветлыны вöлi сьöкыд. 1959-öд восянь 1965-öд воöдз уджалiс Ленин нима колхозын. Шойччöг вылö петтöдз Кулöмдiнын «Усть-Куломский» совхозын вöлi медшöр бухгалтерöн.
Бура уджалöмысь сетiсны «100 лет Ленина», «Победитель соцсоревнования», «Ударник 10 пятилетки» медаль да пасъяс, эм уна грамота.
Наталья Зезегова,
Носимса олöмаяслöн котырöн веськöдлысьöс вежысь.
Снимок Н.А.Турьевалöн чукöртöмысь.

Комментарии:

Добавить комментарий

Свежий выпуск: 28 марта

Осторожно — мошенники!