Тимшерса школаысь дас öтиöд класса велöдчысь Карина Крупнова вермис литератураысь ставроссияса олимпиадалöн республикаса тшупöдын.
Нывка сизимöд классянь петкöдчö роч кывйысь, литератураысь, историяысь, обществознаниеысь олимпиадаясын. Вермöмъяс вöлiны и водзтi, но сöмын районса тшупöдын. Радейтö гижны сочинениеяс, гижöд йылысь сьöлöмкылöмъяс. Литератураысь татшöм ыджыд вермöмыс медводдзаысь. Зэв нимкодь ас вöсна. Лыддьысьöмö ышöдiс пöчыс, кодлöн киас пыр вöлi небöг. Нывка дзолядырсянь видзöдiс сы вылö, эз и казяв, кыдзи босьтчис и ачыс. Лун-лун вермис пукавны книгаяс сайын. Мамыс пыдди пуктiс нылыслысь лов кыпöдантор-сö да пыр ньöбалiс выль небöгъяс.

• Школаса программа серти висьтъяс менö вöрзьöдiсны сизимöд классын, — висьталiс Карина. — Аслым восьтi А.П.Чеховöс, кодi лоö менам медрадейтана гижысьяс лыдын. Кöкъямысöд классын миян дорö локтiс Елена Дмитриевна Крючкова, кодi аслыспöлöса нуöдiс урокъяс, сэтшöм бура висьтавлiс гижöдъяс йылысь, восьтiс налысь сюрöссö да литература лоис нöшта мусаджыкöн. Öкмысöд классын вобыд дасьтыси экзамен кежлö. Сэки жö восьтi М.Ю.Лермонтовöс. Сiйö воас торъя ёна нин лыддьыси. Гижи уна сочинение. Дасöд классын сьöлöмöс вöрзьöдiсны Л.Н.Толстой, Ф.М.Достоевский, М.А.Шолохов, М.А.Булгаков. Öнöдз на найöс лыддя. Таво бара бöрйи литератураысь экзамен да водзö ассьым олöмöс кöсъя йитны сыкöд — лоны журналистöн либö кыв туялысьöн. Школаса программа серти урчитöмторъяс кындзи лыддя мукöд книгаяс. Тайö фантастика, романъяс да военнöй темаа, сiдзи жö, окотапырысь история да психология йылысь небöгъяс. Лыддя да донъяла висьтса ли романса геройлысь вöчöмторъяс, сылысь пытшкöсса олöмсö.
  Менам семьяын Алёна Андреевна Попова мам, Виталий Сергеевич Крупнов бать, Кирилл да Константин вокъяс. Бать-мамöй лыддьысьöны жö.
  Литератураысь менам вöлi куим велöдысь: Антонина Ивановна Паршукова, Елена Дмитриевна Крючкова да Анастасия Андреевна Пальшина, кодi велöдö öнi на. Антонина Ивановна зэв бура висьтавлiс гижысьяслöн олан туй йылысь, унатор колис менам вежöрö. Анастасия Андреевна тöдмöдiс менö «Два капитана» романöн, кодi лоö менам радейтанаяс пиысь öтиöн. Висьтавлiс сьöлöм вöрзьöдана небöгъяс йылысь. Елена Дмитриевна бура дасьтiс экзаменъяс кежлö. Сэтшöм лöсьыда висьтавлiс гижöд йывсьыс, мый меным эз ков дасьтысьны содтöд.
  Лыддьысьöм кындзи радейта йöктыны. Водзтi петкöдчылi миян клубын. Весиг квайтöд классöдз кöсйи лоны йöктыны велöдысьöн. Эновтчи тайö мöвпсьыс. Öти кадö гижлi кывбуръяс. Öнiя том йöз лыддьысьöны этша. Зэв унатор воштöны. Öд небöгъясысь позьö тöдмавны унатор, босьтны выль тöдöмлун, кодъяс ковмасны олöмын. Велöдчан овны и восьтан асьтö, — сёрнитiс Карина.
  Нывка пырöдчö челядьлöн россияса öтмунöмö, зэв водзмöстчысь, пыр отсасьö. Сiдз-жö ёртасьö спорткöд. Дзик на неважöн посёлокын мунiс лыйсьöм кузя «Выльвося яблöк» ордйысьöм, кöнi налöн котыр вермис.
• Каринаöс велöдлi 5-10-öд классъясын. Нывкаыс зэв зiль да нырччысь. Пыр отсалiс меным урокъяс дыр-йи. Пыр вöлi дась. Сизимöд классянь петкöдчö олимпиадаясын. Кольöм воын районса тшупöдын лоис мöдöн. Таво вермис и район-ын, и республикаын. Пыр пуктö ас водзас мог и ставсö вöчö, медым сiйö збыльмас. Ёна лыддьысьö, унатор корсьысьö ачыс. Сыкöд позьö сёрнитны кöть мый йылысь, абу сöмын велöдчöм кузя. Вевъялö вöчны ставсö. Олимпиадаяс кежлö унатор зiлис ачыс, ме сöмын сылы сеталi мöвпъяс, индалi. Весиг ылi посёлокысь челядь вермöны шедöдны вермöмъяс. Зэв нимкодь Карина вöсна, — сёрнитiс Елена Дмитриевна Крючкова.
  Содтам, ставроссияса олимпиадалöн республикаса тшупöдын бура петкöдчисны да лоисны вермысьяс лыдын и мукöд нывкаяс да зонкаяс. Информатикаысь — Кебанъёльысь Артём Ненев (велöдысьыс Наталья Сергеевна Шубёнкина), географияысь Немдiнысь Кристина Паршукова (Нина Ивановна Уляшева), ОБЖ-ысь — Кулöмдiнысь Дмитрий Изъюров (Никита Иванович Попов).
  Велöдчысьясöс да налысь велöдысьяссö чолöмалам ыджыд вермöмöн.
  Галина КЛЮЖЕВА.
  Снимок К.Крупновалöн чукöртöмысь.