«Патриот» — медбуръяс лыдын

[ A+ ] /[ A- ]


Помöсдiнса челядьлöн творчество «Патриот» нима керкаö пыригöн синмад пыр жö шыбитчö пытшкöсыслöн мичлуныс: югыд, кыпыд жыръяс, пыран вежöсас эм аквариум, код дорын окота дырджык сулавны. Гöгöр кылiсны челядьлöн гöлöсъяс, öд урокъяс помасьöм бöрын найö котöртöны кружокъяс вылö. Менö вочаалiс Ирина Николаевна Холопова, «Патриот» керкаса методист да содтöд тöдöмлунъяс сетöм кузя велöдысь, да юöртiс, мый быд лун сизим час рытöдз кружокö ветлöдлысьяскöд уджалöны дас вит педагог. Юрнуöдысьöн лоö Александр Андреевич Глуханич. 
Ирина Николаевна висьталiс, мый челядьлöн творчество «Патриот» керкаын сöвмöдöны ичöт войтырлысь сямсö уна боксянь. Сiйö кадас, кор ме локтi, Фаина Михайловна Шомысова юрнуöдöм улын нывкаяс мичаа кыисны кöсаяс. Велöдысьлöн висьталöм серти, найö унатор нин кужöны вöчны, весиг шырны юрси. А медся шензьöданаторйыс вöлi сiйö, мый нывкаяс велöдыськöд öттшöтш ветлывлöны мукöдлаö, шуам Скöрöдумö либö Ягкöджö, петкöдлыны кужанлунсö. Сиктса йöз окотапырысь волöны на дорö, öд юрсиктö та могысь быд здукö он мун. Татшöм сямыс ковмас сэк, кор нывкаяс, школа помалöм бöрын, кутасны бöрйыны удж, лöсялас и налöн олöмын. Мöд жырйын кылiсны гитараöн ворсöмлöн шыяс. Дмитрий Михайлович Филиппов велöдiс зонкаöс бöрйыны колана шылад. Неважöн на «Акустические ребята» нима сьылан-ворсан котырыс Кулöмдiн районса «Василёк» фестиваль вылын босьтiс коймöд места, кöть и петкöдчисны медводдзаысь на. Дмитрий Михайлович уджалö и посньыдджыкъяскöд. Нимсö бöрйöмаöсь зэв мичаöс — «Звенящие струны». Кольöм воын челядь петкöдчисны «Весенние ритмы» республикаса фестивальын. Бура сьылöмысь-ворсöмысь сетiсны диплом. «Патриотын» Валентина Васильевна Игнатова велöдö йöктыны. Екатерина Михайловна Чугаева ворсöдö теннисысь, а нывкаяскöд — пусьöны-пöжасьöны да лöсьöдöны быдсяма ас киöн вöчöмторъяс. Илона Александровна Литвинова сöвмöдö челядьлысь серпасасян сям. Анна Михайловна Игнатова ветлö ичöт дзолюкъясöс видзанiнö, кöнi ва либö мукöдторъясöн тöдмалöны-туялöны миянöс кытшалысь олöмсö, а гырысьджыкъяскöд вöчасьöны вурунысь. Ирина Николаевна Холопова велöдö кысьыны бисерöн. Ольга Михайловна Омельченколöн ичöт войтырыс велалöны быдтор вöчны и сёйысь, и бумагаысь да мукöдторйысь, а сiдзжö сiйö нуöдö быдсяма ворсöмъяс да юржугланторъяс. Бура пуктöма уджсö челядьлысь дзоньвидзалун сöвмöдöм боксянь. Физкультура да спорт радейтöм тыдовтчö сыын, мый велöдчысьяс тшöкыда пырöдчöны районын котыртöм ордйысьöмъясö да вермöны. Александр Андреевич Глуханич сöвмöдö ичöт зонкаясöс фут-болысь ворсöмöн, а гырысьджыкъясöс ёнмöдны вынсö. 
Степан Витальевич Пашнин велö-дö ворсны футболысь, Николай Семёнович Чувьюров — лыйсьыны стöча пасö, Александра Ильинична Игнатова — вермасьны пинг понгöн. Абу кольöма бокö ас чужан му туялöм кузя удж. Егор Геннадьевич Шабанов дорын зонкаяс велöдчöны бурджыка тöдмавны да дöзьöритны вöр-ва. Евгений Михайлович Филипповкöд челядь вöчöны быдсяматорйысь танкъяс да мукöдтор. Сыкöд тшöтш Руслан Валерьевич Попкович велöдö челядьöс тöдны пыдiсянь техника, трактор. Кык во мысти налы сетсьö сертификат. Кольöм воын квайтöн босьтiсны татшöм документсö. 
Колö казьтыштны сы йылысь, мый кружокъясыс уджалöны и мукöд сиктъясын: Бадьёльйылын, Скöрöдумын, Вöльдiнын, Ягкöджын да Дiасёръяын. Ставыс ветлöдлö 549 морт. 
Помöсдiнса челядьлöн творчество керка «Патриот» балаясöн пырöдчö уна сикас конкурсö да век медбуръяс лыдын. 
Нина Калистратова. 
Гижысьлöн снимокъяс вылын: Ф.М.Шомысова да Д.М.Филиппов челядькöд.

Комментарии:

Добавить комментарий

Свежий выпуск: за 13 февраля