Йöз вöсна ыджыд тöжда

[ A+ ] /[ A- ]


Тöдмасьöй: Помöсдiнса бурдöдчанiнысь том специалист, терапевт Анна Александровна Третьякова. Ачыс сiйö Дiасёръяысь. Школа помалöм бöрын, 2011-öд воын, пырис велöдчыны Кировса медицина академиялöн Сыктывкарса филиалö. И эз весьшöрö. Сiйö ичöтсянь мöвпалiс лоны бурдöдысьöн. Школаö котралiгöн на куим во содтöд велöдчис Коми государственнöй пединститутбердса химия да биология пыдiсянь тöдöмлун босьтан сиктса енбиа челядьлöн лицейын. Кöсйис эськö лоны педиатрöн, но артмис, мый бöрйис терапевтлысь специальносьт.
Медицина академияын велöдчöм помалöм бöрын индiсны уджавны Чилимдiнын, но оланiн абутöмла сэнi зiлис регыдик. Бöр локтiс чужанiнас, Помöсдiн вожö. Вöзйысис Помöсдiнса больничаö. Танi уджалан ин вöлi да пыр и босьтiсны.
И со кык во нин танi. Вочаалiсны Анна Александровнаöс кыдз бур специалистöс. Татчöс уджалысьяс сiйöс бура нин тöдiсны, öд сiйö 2012-öд восянь быд во танi вöлi практика вылын, а 2015-öд восянь каникулъяс дырйи уджалiс тэрыб отсöг сетан юкöнын медсестраöн, сылöн сэки киас вöлi нин тайö специальносьт кузяыс сертификат. Кутшöмкö кад уджыштiс и карын челядьлöн реанимацияын чужся кагаяслöн юкöнын. Сы вöсна уджö босьтчигöн сылöн вöлiны нин зумыд тöдöмлунъяс да сям.
Сiйö медсясö примитö висьысьясöс. Сылöн видзöдлас улын Бадьёльйывса, Выльгортса, Сордйывса, Ягкöджса да Вöльдiнса олысьяс, сы вöсна и асланыс майшöгъясöн шыöдчысьыс пыр уна, ков-мылö индöм кадысь примитны найöс ёна дырджык. Сы бöрын корöмъяс серти ветлывлö сьöкыда висьысьяс дорö гортöдзыс, матысса олысьяс дорö подöн, а ылыссаяс дорö, торйöн орчча сиктсаяс дорö, машинаöн. Но мытшöдыс сыын, мый уджаланыс, «скорöйса» кындзи, сöмын öти, сы вöсна пырöн уськöдчыны, овлö, позянлуныс абу. Тшöкыда йöзöс кытшовтны ковмылö кöкъямыс час рытöдз. Мöд тöдчана мытшöд — Вöльдiн дорса ю вомöн вуджöм. Таво матö тулыссяньыс туй орлывлiс ыджыд ва вöсна, некыдз вöлi воöдчыны Ягкöджö. Сэтчöс ФАП-са медсестра колiгöн звöнитчылiс сылы, юасис, кыдзи бурдöдны сiйö либö тайö висьысьясöс. Ёна сьöкыда нёрпалысьясöс вуджöдлiсны пыжöн. Öтчыд эз пов-зьыны да чорыда висьысьла машинаöн вуджалiсны веськыда ва кузя, кыдзкö Енмыс отсалiс да лючки лэччöдiсны сiйöс Кулöмдiнöдз. Помöсдiнса бурдöдчанiнын эськö эм куйланiн, но сэнi сöмын вит койка, кодъяс прöстмывлöны гежöда, со и висьысьяссö лоö нуны юрсиктö. Сыысь кындзи Анна Александровна быд воторникö ветлывлö аслас участокса сикт-посёлокъясö: öти вежонö, шуам, Бадьёльйылö, мöдö — Вöльдiнö да с.в. Медсестраыскöд уджалöны сэнi лунтыръясöн, примитöны висьысьясöс.
Приёмъяс нуöдöмысь кындзи Анна Александровна дежуритö тэрыб отсöг сетанiнын, видлалö сэтчö вайöм висьысьясöс. Колö шуны, мый бурдöдысьлöн уджыс юрвывтырыс, помасьлытöм. Уна кад босьтö и диспансеризацияяс да медосмотръяс нуöдöм. Но том ань оз элясь сьöкыдлунъяс вылö, быд удж вöчö кывкутöмöн, аслас кадöн артасьтöг, öд тшöкыда ковмылö висьысь дорö котöртны кöть войын, кöть шойччан лунö. Сы вылö пö и бöрйи тайö уджсö, медым тöждысьны йöзлöн дзоньвидзалун вöсна.

Галина НЕСТЕРОВА.
Гижысьлöн снимок вылын: А.А.Третьякова.

Комментарии:

Добавить комментарий

Свежий выпуск: 28 марта

Осторожно — мошенники!