Бöръя воясö миян Немдiн сикт да сійöс нимöдысьяс йылысь петіс некымын книга. 2015-öд воын — «Герой Советского Союза Георгий Тимушев» да «Усть-Немская школа сквозь годы (1860-2015)». 
Георгий Фёдорович чужан сиктсö нимöдіс Великöй Отечественнöй война вылын Рöдинаöс дорйигöн Сöветскöй Союза Геройлысь ним шедöдöмöн. Книгасö лöсьöдісны районысь журналист Николай Александрович Лютоев да велöдысь Нина Алексеевна Нефёдова. Налы отсасисны Немдінса да Кулöмдінса библиотекаясын уджалысьяс. 
Сійö жö воын Немдiнын чужысь да сиктса школа помалысь Александр Иванович Напалков сиктса шöр школалы 150 во тыригкежлö лэдзис «Усть-Немская школа сквозь годы (1860-2015)» книга. 
А мöд вонас петiс куим Слава ордена фронтöвик Андрей Антонович Тимушев йылысь книга. Бара жö гижис да лэдзис Н.А.Лютоев. 
Таво нимöдісны Александр Иванович Напалковлысь «Фронтовики и труженики тыла Усть-Немской земли в 1941-1945 гг.» книга, кодöс лэдзисны Победалöн лун кежлö. Сэні казьтылöма Немдінса да орчча сикт-посёлокса йöз йылысь, кодъяс вöлiны война вылын да уджалiсны тылын. Книга дасьтысь чукöртіс олöма йöзлысь казьтылöмъяс, налöн челядь-внукъяслысь корсьысьöмъяс, ёна уджаліс архивъясын. Медым лэдзны тайö книгасö, Александр Иванович йитчис овмöдчöминса юрнуöдысьяскöд, библиотекаясын уджалысьяскöд, велöдысьяскöд, кодъяс отсалісны водзынджык чукöртöм гижöдъясöн, вуджöдісны найöс роч кыв вылö. 
А Немдінын тайö уджö 1960 восянь медводз босьтчылiс Клара Антоновна Тюрнина — история велöдысь. Сыысь бурджыка Немдін да сэтчöс йöз йылысь некод эз тöд. Война вылын тышкасьысьяс йылысь казьтылöмъяс чукöртiс и пенсия вылын, ылiын олысьяскöд письмöасис. Салдатлöн дöваяс да тылса уджалысьяс йылысь уна гижöд чукöртіс школаын коми кыв велöдысь Нина Михайловна Гуляева. 
Книга нимöдiгöн культура керкаын сёрнитісны школаса вöвлöм директор да история велöдысь, война кадö быдмысь Михаил Спиридонович Тюрнин, сиктса юралысь Анатолий Васильевич Пименов, гижысь Вячеслав Леонидович Бабин, школаса вöвлöм директор Галина Ивановна Канева. Ставныс найö отсалісны лэдзны тайö книгасö. 
Александр Иванович ачыс висьталіс, кыдзи чужис книга лэдзöм йылысь мöвп, кыдзи уджаліс архивъясын, мый тöдмаліс выльсö. Та вылö муніс куим во. Сиктса йöз йылысь позьö на водзö гижны да гижны. Водзö вылö Александр Иванович кöсйö лэдзны нöшта некымын книга. 

Анна ЛИПИНА, 
библиотекаöн веськöдлысь.